Саха сиригэр оҕолордоох дьиэ кэргэни көрдүүллэр. От ыйын 25 күнүгэр эр киһи, дьахтар уонна икки кыра оҕо Мохсоҕоллооҕунан өрүһү туоруур сиртэн Алдан оройуонун Улуутун — Үөһээ Амматын сирдэрин диэки сир астыы барбыттар уонна ханна баалларын билиҥҥэ диэри биллэрэ иликтэр.
Өрөспүүбүлүкэтээҕи ИДьМ иһиттиннэрэринэн, сураҕа суох сүппүттэр ханна тиийбиттэрин быһаарарга туох баар тэрээһиннээх үлэ ыытыллар, нэрээттэр барбыттар.
Сүппүт ыал маҥан дьүһүннээх «Тойота-Гая» массыыналаах, нүөмэрэ — А462МР14. Массыына кэлин икки ааныгар «Гая» диэн английскайдыы суруктаах.
Эр киһи — 40-45 саастаах көрүҥнээх, 160-175 см үрдүктээх, орто толору эттээх-сииннээх, хараҥа баттахтаах, азиаттыы быһыылаах сирэйдээх. Атаҕын таҥаһын размера — 40, шортиктаах, сиэрэй поло-футболкалаах.
Дьахтар — 40 саастаах, 160 см үрдүктээх, толору эттээх-сииннээх, уһун хара баттахтаах. Атаҕын таҥаһын размера — 36-37, хайдах таҥастааҕа биллибэт, суотабай төлөпүөннээх.
10 саастаах кыыс оҕо, 140-150 см үрдүктээх, хара панаамалаах, эриэн сырдык футболкалаах, хара ыстааннаах, маҥан кроссовкалаах.
8 саастаах кыыс оҕо, 120-130 см үрдүктээх, хараҥа дьүһүннээх маҥан сибэкки ойуулардаах куопталаах, сырдык күөх ырбаахылаах, хараҥа футболкалаах, джинсы бүрүүкэлээх, маҥан кроссовкалаах.
Бу дьон туһунан тугу эмит билэр буоллаххытына, Хаҥаластааҕы Ис Дьыала министиэристибэтин дьуһуурунай чааһыгар биллэриҥ: 8 (41144) 41-202,+7 (914) 717-63-26; +7 (924) 662-72-22.