Маны аах Уопсастыба

Саха сиригэр улахан геологическай чинчийиилэр барыахтара

РФ бэрэсидьиэнэ Владимир Путин Арктика сайдыытыгар ыыппыт мунньаҕар ньиэп, гаас дойду иһигэр күүскэ туһаныллыаҕын, атын тас дойдулары кытары сибээс олохтонуоҕун туһунан эппитэ. Итиннэ Арктика, хоту дойду биир сүрүн оруолу ылар. “Сахагеоинформ” тэрилтэ салайааччыта Виталий Калашников иһитиннэрбитинэн, Саха сиригэр икки сиргэ улахан чинчийиилэр ыытыллыахтара.

Мунньахха геологическай чинчийиилэр тустарынан кэпсэтии барда. РФ айылҕатын ресурсаларын уонна экологиятын министиэристибэтэ быйылгыттан саҕалаан геология сайдыытыгар саҥа бырагырааманы киллэрдэ. Бу бырагыраама чэрчитинэн Саха сиригэр кэлэр үс сылга улахан чинчийиилэр барыахтара. Манна барыта 4 млрд солкуобай көрүллүөҕэ.

Миниистир Александр Козлов иһитиннэрбитинэн, сүрүннээн икки эбийиэккэ сир баайын чинчийии барыаҕа. Бастатан туран, Өймөкөөн уонна Муома кыраныыссаларын икки ардыгар баар Деленкирдааҕы былаһааккаҕа үлэ барыаҕа, иккиһинэн Депутатскай сиригэр чинчийии ыытыллыаҕа. Итини сэргэ ньиэп, гаас, гаас конденсатын, о.д.а. сиртэн хостонор углеводорот сырьетын чинчийии үлэлэрэ барыахтара. Депутатскайга үрүҥ көмүс саппааһын көрүөхтэрэ, өскөтүн сөптөөх саппаас көһүннэҕинэ бу сир инникитин Усуйаана оройуонугар сайдыыны аҕалыаҕа. Оттон Деленкирдааҕы былаһаакканы эттэххэ, бу сир билигин үчүгэйдик үөрэтиллэ, чинчийиллэ илик, – диэн бэлиэтиир Виталий Васильевич.

Аграфена КУЗЬМИНА

2
1
Telegram @edersaas20