Саха сиригэр туристары угуйуу үлэтин пандемия иннинээҕи таһымҥа тиэрдии боппуруоһунан тиһиктээхтик дьарыктаналлар.
2019 сыллаахха 201,4 тыһ.турист сылдьыбыт. Бу көрдөрүү 2020 сыллаахха намтаан 114,5 тыһ. буолбут. Оттон былырыын көрдөрүү 190,5 тыһ. тиийбит. Итиннэ 188,9 тыһ. турист Арассыыйаттан, 1,6 тыһ. айанньыт тас дойдулартан буолаллара бэлиэтэнэр.
«Туристар ахсааннара быйыл салгыы элбиир. Аҥаардас тохсунньу-кулун тутар ыйдарга айанньыттар кэлиилэрэ 43 бырыһыан улаатта. Бастакы кыбаарталга Саха сиригэр 40,4 тыһ.киһи сылдьыбыт буоллаҕына, былырыын бу кэмнэргэ 28,2 тыһ.киһи сылдьыбыта бэлиэтэнэн турар«, — диэн этэр СӨ Урбааҥҥа, атыыга уонна туризмҥа миниистирэ Тимур Ханды.
Өрөспүүбүлүкэҕэ туризм салаатын өйүүр миэрэлэр ылыллаллар.
Туризмы сайыннарыы уонна территориальнай маркетинг ааҕыныстыбатын, «Мин биисинэһим» киин туризмынан дьарыктанар предпринимателлэри наадалаах, туһалаах иһитиннэриилэринэн, сүбэнэн-аманан өйүүллэр, көмөлөһөллөр. Туристическай эбийиэги тэрийэллэригэр уонна сайыннаралларыгар өйөбүлү оҥорон, предпринимателлэр үлэлэрин сайыннаралларыгар көмөлөһөр пуонда нөҥүө биэс сылга болдьохтоох, биэс бырыһыаннаах, биэс мөл. диэри суумалаах микрозайм бэриллэр. Маны сэргэ, туристары түһэрэргэ сылы эргиччи үлэлиир толору хааччыллыылаах эбийиэги тэрийэргэ биир мөл. диэри суумалаах субсидия көрүллэр.
Куонкурус усулуобуйатын, болдьоҕун туһунан иһитиннэриини СӨ дьоҕус уонна орто предпринимательствотын порталыгар portal.b14.ru, «Финансовая поддержка» диэҥҥэ киирэн сиһилии көрүөххүтүн сөп.
+1
+1
+1
+1
+1
+1
+1