Бүгүҥҥүттэн COVID-19 ыарыы тарҕаныытын бохсууга киирбит хааччахтар алтынньы 31 күнүгэр диэри уһатылыннылар. Бу туһунан Ил Дархан Айсен Николаев ыйааҕа таҕыста.
Ыйаахха этиллэринэн, Саха сиригэр бүгүҥҥүттэн саҕалаан элбэх киһи мустар араас тэрээһинин ыытыы, ол иһигэр култуурунай-маассабай, спорт, сырдатар, рекламалыыр, аттракционнары ыытыы, о.д.а. тэрээһиннэр, тохтотулуннулар. Ол эрээри култуура, спорт эбийиэктэрэ үлэлэрин салгыы ыытыахтара. Бары ирдэбиллэри тутуһан туран тыйаатырдар, музейдар, спорт кииннэрэ үлэлиэхтэрэ.
Саха сирин санитарнай кылаабынай бырааһын уурааҕынан, тэрилтэлэр үлэһиттэрин 50 % ыраахтан олорон үлэлииргэ ыытыахтара, ону таһынан үлэлии сылдьар оҕо күүтэр дьахталлар, төрүүр кэмнэрин болдьоҕуттан тутулуга суох, эмиэ дьиэлэриттэн олорон үлэлиэхтэрэ.
Доруобуйа харыстыбалын министиэристибэтин этиитинэн, сорох куораттар, улуустар балыыһаларыгар аҕа көлүөнэлэргэ медосмотру, диспансеризацияны ыытыы сэтинньи 1 күнүгэр диэри тохтотуллуохтара.
Аграфена КУЗЬМИНА