Саха сиригэр таас чох, ньиэп, гаас хостооһуна хас да төгүл улаатта
Саха сиригэр үлэлиир бырамыысыланнас хампаанньаларын 2019 сыллааҕы үлэлэрин түмүктүүр уонна 2020 сылга былааннарын билиһиннэрэр мунньах бэҕэһээ тохсунньу 30 күнүгэр буолан ааста.
edersaas.ru
Михаил Кириллин, СӨ Бырамыысыланнаһын уонна геологиятын миниистирин 1 солбуйаччы:
—2019 сыл бырамыысыланнас тэрилтэлэригэр үрдүк көрдөрүүлээх сыл буолла. Өрөспүүбүлүкэҕэ 36,5 туонна кыһыл көмүс, 19,2 мөлүйүөн туонна таас чох хостонно. Ахсынньы 2 күнүгэр «Сибиир күүһэ» үлэҕэ киирэн, Чайыҥда ньиэп-гаас конденсаттаах сиригэр улахан кээмэйдээх гаас хостонон барда, — диэн билиһиннэрдэ.
Ону таһынан, кэнники кэмҥэ ньиэп хостооһуна улаатта. Былырыын алтынньыга «Сургутнефтегаз» ньиэптээх сири арыйан, үрдүк көрдөрүүнү биэрэн эрэр.
Итиэннэ 3,1 миллиард куб м гаас туһаҕа таҕыста. «ЯТЭК», «Сахатранснефтегаз», “АЛРОСА-Газ” тэрилтэлэрэ өрөспүүбүлүкэни гааһынан хааччыйаллар. Быйыл былаан быһыытынан нэһилиэктэри салгыы гаас оттукка холбуохтара.
«Сибиир күүһэ» магистральнай гаас турбата ааһар сиринэн түөрт соҕуруу оройуоннарга Өлүөхүмэҕэ, Алдаҥҥа, Нерюнгрига, Ленскэйгэ 30 нэһилиэк гаас утаҕар 2020 сылга холбонуо. Бу бырагыраама 2027 сылга диэри үлэлиэҕэ.
Онон айылҕа баайын хостуур хампаанньалар олохтоох хааһынаҕа киллэрэр нолуоктара сыл ахсын биллэ улаатан иһэрин бэлиэтээтилэр.
Марианна Тыртыкова, Саха сирэ, edersaas.ru