Кэлэр үс сылга эрэгийиэннэргэ 172,3 миллиард солкуобай суол тутуутугар уонна өрөмүөнүгэр көрүллүөҕэ. Бу үп тарҕатыллар уонна туһаныллар быраабылатын бу күннэргэ Арассыыйа бырабыыталыстыбатын бэрэссэдээтэлэ Михаил Мишустин бигэргэттэ. Саха сирэ ити үптэн 240 мөлүйүөн солкуобайы ылыаҕа.
edersaas.ru
Федеральнай үбүлээһин эрэгийиэннэргэ аныгылыы уонна хаачыстыбалаах суол инфраструктуратын тэрийэр, ону тэҥэ интеллектуальнай тырааныспар тиһигин үлэҕэ киллэрэр кыаҕы биэриэҕэ. Итинник тиһик айан ситимин салайар үлэни автоматизациялыырга уонна суолга тахсар быһылаан ахсаанын аччатарга көмөлөһүөҕэ.
Бу быһаарыы ахсынньы 24 күнүгэр Бырабыыталыстыба мунньаҕар көрүлүннэ уонна биһирэннэ.
Үлэ «Куттала суох уонна хаачыстыбалаах массыына суоллара» национальнай бырайыак чэрчитинэн ыытыллар. Бырайыак соруга -2024 сылга диэри эрэгийиэннэргэ тутуллар суоллар ирээттэрин нормативнай ирдэбиллэргэ сөп түбэһиннэрэн, суол быһылаанын ахсаанын намтатыы, саҥа ирдэбиллэри уонна стандартары киллэрии, ону тэҥэ суолу-ииһи тэрийии уонна суол быраабылатын тутуһуллуутун хонтуруоллааһын технологияларын киллэрии.
«Саха сирэ» хаһыат, edersaas.ru