Саха сиригэр судаарыстыбаннас сайдыытыгар туһуламмыт кэмпириэнсийэ ыытыллыаҕа
Балаҕан ыйын 27 күнүгэр Хаҥалас улууһун Өктөм нэһилиэгэр «Саха норуотун төрүттэниитэ уонна Арассыыйа састаабыгар Саха сирин судаарыстыбаннаһын сайдыыта» диэн научнай-практическай кэмпириэнсийэ ыытыллыаҕа.
Суолталаах тэрээһин Саха Өрөспүүбүлүкэтин Судаарыстыбаннаһын күнүгэр ананан, куйаар ситиминэн ыытыллыаҕа.
Тэрээһиҥҥэ Саха сирин бастакы Бэрэсидьиэнэ М.Е. Николаев, СӨ Судаарыстыбаннай Мунньаҕын (Ил Түмэн) бэрэссэдээтэлэ А.И. Еремеев, СӨ Конституционнай сэбиэтин бэрэссэдээтэлэ П.В. Гоголев, Федерация сэбиэтин кэмитиэтин бэрэссэдээтэлин солбуйааччы А.К. Акимов, Кыргыз Өрөспүүбүлүкэтин учуонайдара уонна чинчийээччилэрэ, Арассыыйа 12 эригийиэниттэн кыттыыны ылыахтара.
Тэрээһин сыала-соруга — судаарыстыбаннас, федерализм боппуруостарыгар сыһыаннаан, былаас бары уорганнара бииргэ үлэлээһиннэрин ситиһиигэ туһаайыллыбыт судаарыстыбаннай былаас уонна олохтоох салайыныы уорганнарын салайааччыларын, научнай, үөрэхтээһин, мусуой уонна бибилэтиэкэ үлэһиттэрин биир санааҕа түмэн, саха норуотун төрүттэниитин, судаарыстыбаннас сайдыытын дириҥник үөрэтиигэ туһаайыы.
Кэмпириэнсийэҕэ Кыргыз, Башкортостан, Татарстан, Хакасия өрөспүүбүлүкэлэриттэн, Москва уонна РФ араас эригийиэннэриттэн онлайн-форматынан кыттыахтара.
Елена ПОТОЦКАЯ, “Саха сирэ” хаһыат, edersaas.ru
Хаартыска — СИА.