Саха сиригэр сааскы, сайыҥҥы-күһүҥҥү халаан уутун куттала суох аһарыыга бэлэмнэнэллэр. Онно туһаныллар кыах-күүс бэлэмнэниллэр, мууһу чарааһатыы үлэтэ, дириҥэтии, өрүс сүнньүн уларытыы күүтүллэр. Бу сылга федеральнай уонна эрэгийиэн бүддьүөтүгэр 153 мөл солк. көрүлүннэ.
Дмитрий Садовников ыксаллаах быһыыны-майгыны туоратыыга уонна баһаартан сэрэхтээх буолууну хааччыйыыга хамыыһыйа мунньаҕын ыытта. Өрөспүүбүлүкэ бастакы вице-премьерэ ыытыллар үлэлэр хаамыыларын сыаналаата уонна соруктары туруорда.
“2022 сылга бэлэмнэнии сүрүннээн үгэс курдук ыытыллар. Билиҥҥитэ чуолкай сабаҕалааһын оҥоһулла илик, ол эрээри Халыма улуустарыгар, ону тэҥэ уруккуттан өрүс харар учаастактарыгар Өлүөнэҕэ уонна Алдаҥҥа балаһыанньа уустук буолуох курдук. Ол иһин биһиги кэлимсэ үлэлэри ыытыахтаахпыт, бары күүһү бэлэм гыныахтаахпыт”, — диэтэ кини.
Кини этэринэн, федеральнай хааһынаттан халааны сэрэтиигэ муус халыҥын чарааһатыыга 37 мөл. кэриҥэ көрүллүбүт, маны толорооччулар ортолоругар куонкуруһу ыытыы саҕаланна. Дойду бүддьүөтүгэр өрүс сүнньүн көннөрүүгэ уонна дириҥэтэр үлэлэргэ 16 мөл кэриҥэ угулунна. Өрөспүүбүлүкэ бэлэмнэнии үлэтигэр 100 мөл солкуобайы көрүөҕэ. Эбии 150 мөл. солкуобай — саппаас пуондаҕа.
Садовников ЫБМ чилиэннэригэр, олохтоох салайыныы уорганнарыгар бары тэрээһиннэри ыыталларыгар, ону тэҥэ ыксал суоһуур түгэнигэр күүһү түмүү былаанын торумнуурга соруйда.
Кини халаан иннинээҕи тэрээһиннэри уонна гидротиэхиньиичэскэй тутууларга быстах өрөмүөнү толорорго, өрөспүүбүлүкэ өрүстэригэр суһал бөлөхтөр тиийиилэрин тэрийэргэ, харыы тахсар учаастактарын көрөргө дьаһайда.
Бүлүүтээҕи ГЭС-кэ уу каскада кыратынан, Бүлүү эбэҕэ харыы тахсыан сөбүнэн бастакы вице-премьер бу оройуоннарга кичэллээхтик бэлэмнэнэллэригэр сүбэлээтэ.
Дьокуускайдааҕы гидрометкиин чахчытынан, быйыл өрүстэргэ муус халыҥа нуорматтан намыһах. Нуорманы куоһарыы Томпо оройуонугар Алдан учаастактарыгар, Кэбээйи улууһугар Өлүөнэ өрүскэ уонна Халымаҕа бэлиэтэнэр. Харыы туһунан муус устар 15 күнүн эргин чопчуланыаҕа.
2022 сылга ЫБМ сэрэтиигэ уонна туоратыыга материальнай саппаас кэҥиэҕэ, түргэнник оҥоһуллар быһыттары атыылаһыахтара, оһохторунан, балааккаларынан, мотопуомпаларынан хааччыллыахтара.
Быйыл кэтээн көрүүгэ авиацияны туһаныахтара. Арассыыйа ЫБМ Хабаровскайдааҕы авиациянан быыһыыр киинин бөлөҕүн күүһүрдүөхтэрэ, Ми-8 бөртөлүөтү эбии кытыннарыахтара. Дьону көһөрүүгэ 12 салгын суудунатын туһаныахтарын сөп. Ону тэҥэ 8 пилота суох БАС авиационнай комплекс бэлэм буолбут.
Спутниктан эмиэ кэтиэхтэрэ, быйыл үһүс сылын Роскосмос госкорпорация мобильнай приемнуур-передаточнай комплекса туһаныллар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Мария Васильева хаартыската (СИА)
Бэлэмнээтэ Женни Стрюкова