Маны аах Нацбырайыактар

Саха сиригэр саамай улахан оскуола тутуллар

2022 сылга Дьокуускай куорат 68 түөлбэтигэр «Үөрэх» национальнай бырайыак иитинэн, өрөспүүбүлүкэҕэ саамай улахан оскуола дьэндэйэн тахсыа. 
Кыһаны «Прометей» ХЭУо тутар. Уопсайа 13 070,876 кв. иэннээх үс мэндиэмэннээх оскуолаҕа 990 оҕо үөрэниэ диэн СӨ Тутуу министиэристибэтин пресс-сулууспата иһитиннэрэр. Бэлиэтэнэринэн, эбийиэк 48 % бэлэм. Түөрт блок тутуллубут, түннүктэр туруоруллубуттар, сорох өртүгэр сылааһы холбообуттар.
Билигин тутааччылар ититии систиэмэтин тардаллар, уута-хаар сүүрэр сирин, вентиляциятын оҥороллор. Ону тэҥэ мэндиэмэннэринэн үлэ ыытылла турар.
Оскуола хас да блога сылаас көрүдүөрүнэн ситимнэһэр. Алын сүһүөх кылаас оҕолоро үөрэнэр сирдэрэ туспа киирэр сирдээх. Онно 12 кабинеттаах, ону сэргэ технология, логопед-дефектолог хосторо бааллар. Рекреационнай зонаны таһынан, өссө манна оҕолор оонньуур уонна сынньанар сирдэрэ оҥоһуллаллар.
Орто сүһүөх уонна үрдүкү кылаас үөрэнээччилэригэр 20 кабинет, аан хос, иккис уонна үһүс мэндиэмэннэргэ рекреациялар баар буолаллар. Үөрэнэр кабинеттары таһынан үлэ уруогун хоһо,  мастарыскыай, астыырга үөрэтэр хос, о.д.а. былааннаналлар.
Бастакы этээскэ уопсай блокка 500 киһи олорон аһыыр миэстэлээх остолобуойданар. Иккискэ — миэбэли көһөрө сылдьан туруорарга анаммыт дэгиттэр аактабай саала,  иһитиннэрэр-биллэрэр библиотека киинэ былааннаммыттар. Үһүс мэндиэмэн педагогтарга уонна салалтаҕа ананар.
Бырайыагынан оскуола сиригэр-уотугар сүүрэргэ-көтөргө уонна ону таһынан, аныгы бүрүөһүннээх дэгиттэр былаһааккалар былааннаммыттар.
0
0
Telegram @edersaas20