Ыам ыйын 25 күнүгэр хомолтолоох күн — Сүтэн баран көстүбэтэх оҕолор Норуоттар икки ардыларынааҕы күннэрэ бэлиэтэннэ.
edersaas.ru
1979 сыллаахха ыам ыйын 25 күнүгэр оскуолаттан дьиэтигэр кэлэн иһэн Эвиан Пейтс диэн алта саастаах оҕо сүтэн хаалбыта. Кырачаан киһини көрдүү сатаан баран, булбатахтара. Оҕо сүппүтэ төрдүс сылыгар 1983 сыллаахха АХШ бэрэсидьиэнэ Рональд Рейган ыам ыйын 25 күнүн Сүппүт оҕолор Национальнай күннэринэн биллэрбитэ. 2010 сылтан бу күн Сүппүт оҕолор Норуоттар икки ардыларынааҕы күннэрин быһыытынан биллэриллибитэ.
Европа судаарыстыбалыгар статистика көрдөрүүтүнэн сыл аайы 70 тыһ. сааһын ситэ илик оҕо сүтэр. Арассыыйаҕа — 55 тыһ. оҕо. АХШ-га 800 тыһ. кэриҥэ оҕо.
Арассыыйаҕа Сүппүт оҕолор Национальнай кииннэрэ 2014 сыллаахха тэриллибитэ. Киин 34 региоҥҥа филиаллаах. Уопсастыбаннай хамсааһыны РФ Бэрэсидьиэнэ Владимир Путин өйүүр.
— Бу күннэргэ Дьокуускайга Сүппүт оҕолору көрдүүр Арассыыйатааҕы Национальнай киин дириэктэрэ Валерий Солянин уонна бу киин салайааччытын солбуйааччы Дмитрий Захаров кэлэн, өрөспүүбүлүкэҕэ социальнай боппуруостарга эппиэттээх салайааччыларын, суруналыыстары кытта көрүстүлэр.
Киин салайааччылара регионнарга барыларыгар филиаллары аһар соруктаахтар. Сүппүт оҕолору көрдүүр Арассыыйатааҕы Национальнай киин үлэтин сүрүн хайысхата — оҕолору көрдүүргэ анал идэлээх исписэлиистэринэн тустаах технологиянан волонтердары үөрэтии, — диэн бэлиэтиир СӨ Дьиэ кэргэн бэлиитикэтин уонна ыччат миниистирин солбуйааччы Савва Михайлов.
Сүппүт оҕолору көрдүүр Арассыыйатааҕы Национальнай киин дириэктэрэ Валерий Солянин уонна СӨ Дьиэ кэргэн бэлиитикэтин уонна ыччат миниистирэ Иван Луцкан бииргэ үлэлээһиҥҥэ сөбүлэҥ түһэристилэр.
Бу докумуоҥҥа олоҕуран, сүппүт оҕолру көрдүүр этэрээттэр тэриллиэхтэрэ , ону тэҥэ ыараханнык ыалдьар оҕолорго киин Арассыыйа бөдөҥ клиникаларыгар эмтэниини тэрийиэхтэрэ.
Бэс ыйын 24 күнүгэр өрөспүүбүлүкэ хара күнү — Алина Иванова уонна Аяна Винокурова Сиинэҕэ сүппүттэрэ биэс сылын бэлиэтиэҕэ. Кыргыттар ууга тааһы бырахпыттыы сүппүттэрэ.
Оттон Өлүөхүмэҕэ сүтэн баран көстүбүт Карина Чикитова билигин Дьокуускайга Аксиния уонна Наталья Посельскаялар ааттарынан балет училищетыгар үөрэнэ сылдьар.
Бүгүҥҥү күҥҥэ өрөспүүбүлүкэ үрдүнэн 10 оҕо сүппүтүнэн ааҕылла сылдьар. Онон Сүппүт оҕолору көрдүүр Арассыыйатааҕы Национальнай киин филиала Дьокуускайга арыллара — кэм ирдэбилэ.
Елена ПОТОЦКАЯ, «Саха сирэ» хаһыат, edersaas.ru