Айылҕа харыстабыла Суолталаах

Саха сиригэр үс ойуур баһаара умайар

Бүгүн, бэс ыйын 7 күнүгэр, сарсыардааҥы туругунан Саха сиригэр Ленскэй, Амма уонна Өлүөхүмэ улуустарыгар ойуур баһаара умайара. Амма уонна Ленскэй улуустарыгар турбут баһаардар бүгүн умуруоруллубуттар. Ол эрээри,  Уус Маайа уонна  Дьааҥы улуустарыгар ойуур баһаардара турбуттар. Ол аата билигин Саха сирин үрдүнэн үс уот умайар.

СӨ Бырабыыталыстыбатын бэрэссэдээтэлин 1-кы солбуйааччы Дмитрий Садовников ойуур баһаарын бохсууга суһал ыстаап мунньаҕын ыытта.  Видеонлайн-эрэсииминэн  мунньахха улуус баһылыктара баар балаһыанньаны иһитиннэрдилэр.

Амма улууһун Болугуругар турбут ойуур баһаара бүгүн күнүс умуруоруллубут. Тустаах үлэҕэ олохтоохтортон 12 киһи уонна «Авиалесоохранаттан» 9 исписэлиис кыттыбыттар. Уопсайа 7 гектардаах сири уот мэҥиэстибит. Бүгүн киэһэ Ленскэйгэ турбут уот бохсуллубут. Ону тэҥэ,  Өлүөхүмэ улууһун Чапаев сэлиэнньэтиттэн 15 км ыраах сиргэ турбут уот бүгүн 15 чаас эргин бохсуллубут. Онон билигин уоту умуорууга 78 киһи уонна 5 тиэхиньикэ үлэлиир. Барыта 670 гектар иэннээх сир былдьаммыт.

Бүгүҥҥү  салгын аалынан анал көтүү түмүгэр,  Уус Маайа уонна Дьааҥы улуустарыгар ойуур баһаардара турбуттара билиннэ. Номнуо 14,1 гектар иэннээх сири күл-көмөр оҥорбуттар. Миэстэтигэр «Авиалесоохрана» десаннара тиийэн үлэлииллэр.  Онон билигин Саха сирин үрдүнэн  3 ойуур баһаара күөх дуолу мэҥиэстэр. Барыта 118 киһи уонна 17 тиэхиньикэ үлэлиир. Мунньахха ойуур баһаардара этиҥтэн турбуттара этилиннэ. Дмитрий Садовников  улуус баһылыктарыгар туһаайан ойуур баһаардара турар кутталлаах кэмнэр сатыылаабыттарынан тустаах хонтуруолу кытаатыннаралларыгар эттэ.  Санатар буоллахха,  былырыын баччаларга Саха сиригэр 36 ойуур баһаара умайара.

Хаартыска — СИА-тан

0
0
Telegram @edersaas20