Саха сиригэр Росавиация салайааччыта Александр Нерадько кэллэ.
Бүгүн, алтынньы 30 күнүгэр, Саха сиригэр Росавиация салайааччыта Александр Нерадько кэллэ.
Росавиация бэрэстэбиитэллэрэ саҥардыллыбыт балаһалаах куоракка — Нерюнгригэ, Дьокуускайтан тэхиньиичэскэй рейс көтүүтүгэр кыттыыны ылыахтара. Өрөспүүбүлүкэ салалтата, министиэристибэлэр Росавиация хамаандатын кытары көрсөн аэропуортары саҥардан оҥоруу уонна сайыннарыы, пассажирдары субсидиялаах билиэтинэн таһыы боппуруостарын кэпсэтиэхтэрэ. Маны сэргэ, 2021 сылга бииргэ үлэлээһин түмүгүн дьүүллэһиэхтэрэ итиэннэ кэлэр сылы былаанныахтара.
«Нерюнгри куоракка биир сезон устатыгар аэропуорка 3,6 тыһ.м. уһуннаах салгын аалын көтөр-түһэр балаһата оҥоһулунна, уота-күөһэ тэрилиннэ. Үлэ болдьоҕун иннинэ түмүктэннэ. Сэтинньи 6 күнүгэр, Нерюнгри куорат 46 сылыгар, бэртээхэй бэлэх буолла дии саныыбын», — диэн Александр Нерадько санаатын үллэһиннэ.
Александр Нерадько салгынынан сырыыны салайар бөдөҥсүтүллүбүт киин саҥа дьиэтигэр сырытта. Киин көтүүнү хааччыйар аныгы автоматизированнай тиһиктээх, сибээһи хонтуруоллуур ситимнээх, куттала суох көтүүнү хааччыйарга кэтээн көрөр навигациялаах. Росавиация бэрэстэбиитэллэрэ киин үлэлиир кыаҕын, үлэһиттэр усулуобуйаларын билистилэр.
«Дойдуга салгынынан сырыыны салайар бөдөҥсүтүллүбүт кииннэр тиһиктэрин тэрийии иитинэн ыытыллар үлэбититтэн бу биирдэстэрэ буолар. Быйыл ахсынньыга Санкт-Петербурга маннык киин арыллыыта түмүктүүр түһүмэҕинэн буолуоҕа. Ити курдук, 2008 сыллаахтан саҕаламмыт киэҥ далааһыннаах бырагыраама түмүктэниэ. Киин үлэһиттэрин истиҥ хардалара биһиги сөптөөх суолунан баран иһэрбитин, маныаха, Саха сиригэр бөдөҥсүтүллүбүт киин тэриллиитэ саамай сөптөөх быһаарыы буоларын бигэргэтэр», — диэн бэлиэтиир Нерадько.
Пандемия кэмигэр тас дойдуга, Арассыыйаҕа уонна Саха сиригэр транзитынан көтүү ахсаана кыччыыр кэмигэр, Арассыыйа хампаанньалара балачча көтүүлэри оҥорбуттарын бэлиэтиир наадалаах. Билигин ис линияларынан пассажирдар кэлиилэрин ахсаана ковид иннинээҕи кэмҥэ, 2019 сыл таһымыгар кэлбит.
Бэлиэтээн эттэххэ, өрөспүүбүлүкэҕэ 32 аэропуорт үлэлиир, итинтэн 16 эрэгийэн аэропуортарын сайыннарыы федеральнай бырайыагар кыттар.
Хаартыскаларга Мария Васильева (СИА) түһэриилэрэ.
+1
+1
+1
+1
+1
+1
+1