Суһал ыстаап салайааччыта Ольга Балабкина коронавирус балаһыанньата билигин даҕаны күчүмэҕэй туруктааҕын туһунан биллэрдэ. Ааспыт хонукка Роспотребнадзор чахчыларынан, Саха сиригэр 144 киһи ыалдьыбыт. Олортон 81 киһи Дьокуускай куорат олохтоохторо. Атын улуустартан ордук элбэх киһи Нерюнгри улууһугар (8 түгэн) ыалдьыбыт, Сунтаарга 7 түгэн бэлиэтэммит, Мииринэй улууһугар 4 киһи сутуллубута чахчыламмыт. Атын улуустарга 1-2 киһи сутуллубуттар.
Ыарыы тарҕаныыта үксүн сайыҥҥы уоппускаларыттан кэлбит дьонтон сыстыһыыны кытта сибээстээх. Онон Балабкина ыраах сырыыттан кэлбит дьону хааччахтаныы миэрэлэрин булгуччу тутуһалларыгар ыҥырда.
Вице-премьер быһыыны ылыан баҕалаахтарга барыларыгар тиийэр вакцина саппааһа баарын туһунан иһитиннэрдэ. Билигин өрөспүүбүлүкэ үрдүнэн ревакцинация хампаанньата саҕаланан эрэр. Ыалдьыбыт эбэтэр вакцина ылбыттара 6 ый ааспыт дьон, саҥаттан вакцина ылыахтаахтар.
Бүгүҥҥү туругунан вакцина маҥнайгы түһүмэҕин 320 тыһыынча кэриҥэ Саха сирин олохтоохторо ылбыттар, ревакцинацияны 4204 киһи ааспыт.
Ааспыт сууккаҕа өрөспүүбүлүкэ үрдүнэн 3 854 короновируска тест оҥоһуллубут. Барыта пандемия саҕаланыаҕыттан 1 352 267 тест оҥоһуллубут. “Бу олус үчүгэй көрдөрүү, тест оҥорууга биһиги Арассыыйаҕа бастыҥнар истэригэр киирэбит. Анаалыһы ылыы ыарыыны эрдэттэн булан эмтииргэ көмөлөһөр” — диэн эттэ Ольга Балабкина.
«Саха сирэ» хаһыат, edersaas.ru
Хаартыска sakha.gov.ru