РФ Бырабыыталыстыбата “Үөрэх” национальнай бырайыак иитинэн Саха сирин оскуолаларыгар саҥа үөрэх миэстэтин таһаарарга эбии үбүлээһини ыытыаҕа. Туһааннаах дьаһалга дойду бырабыыталыстыбатын бэрэссэдээтэлэ Михаил Мишустин илии баттаата диэн Ил Дархан Айсен Николаев бэйэтин инстаграмыгар үллэһиннэ.
Итинтэн 210 мөлүйүөн солкуобайы олохтоохтор 2016 сылтан кэтэспит Сайылык сэлиэнньэтин (Кэбээйи улууһа) 275 миэстэлээх оскуолатын тутуутугар барыаҕа диэн ыйар. “Сайылык оскуолатын тутуутун боппуруоһун сыл анараа өттүгэр Кэбээйигэ сырыттахпына олохтоохтор уонна улуус салалтата туруорсубуттара. Арассыыйа Бырабыыталыстыбатын көмөтүнэн оскуоланы былааннаммытын курдук 2023 сылга буолбакка, 2022 сыл ахсынньытыгар аһар былааннаахпыт” – диэн Ил Дархан суруйар. Итиэннэ дойду Бырабыыталыстыбатыгар махталын биллэрэр.
“Саха сирэ” хаһыат, edersaas.ru