Саха сиригэр үөрэҕи тэрийиигэ хамсык тарҕаныытын бопсор миэрэлэр бигэргэннилэр
Саҥа үөрэх дьылыгар өрөспүүбүлүкэҕэ үөрэҕи тэрийэргэ хамсык тарҕаныытын утары миэрэлэри ылыыны СӨ Ил Дархана Айсен Николаев ыйааҕынан бигэргэттэ.
Туһааннаах докумуоҥҥа олоҕуран, саҥа үөрэх дьыла олохсуйбут (очно) уонна очнай-заочнай көрүҥүнэн итиэннэ саҥа быраабылаларынан 2020 сыл балаҕан ыйын 1 күнүттэн саҕаланар. Ол курдук, Билии күнүгэр анаммыт үөрүүлээх линиэйкэ маҥнайгы кылааска киирэр оҕолорго ыытыллар. Маныаха төрөппүттэргэ хамсыгы утары тэрээһини тутуһуннаран туспа миэстэ көрүллүөҕэ.
Харантыын биллэриллэр түгэнигэр үөрэх дистанционнай технологиялары уонна электроннай үөрэтии көрүҥүн туһанан ыытыллар.
Оскуола иннинээҕи үөрэхтээһин бырагыраамата олоҕурбут көрүҥүнэн (очно) барар.
Эбии үөрэхтээһин бырагыраамалара уонна спортивнай бэлэмнэнии быйылгы үөрэх дьылыгар алтынньы 1 күнүттэн олоҕурбут ньыманан (очно) уонна очнай-заочнай көрүҥүнэн буолаллар.
Айсен Николаев СӨ Доруобуйаҕа харыстабылын министиэристибэтигэр, бу сыл алтынньы 1 күнүгэр диэри оскуоларга миэстэтигэр тиийэн бастакы кылаас үөрэнээччилэригэр эрдэттэн сэрэтэр (профилактика) көрүүлэри ыыталларыгар сорудахтаата. Оскуола атын үөрэнээччилэрин бу сыл ахсынньы 31 күнүгэр диэри көрүөхтэрэ.
Үөрэнээччилэргэ уонна үөрэх тэрилтэлэрин үлэһиттэригэр алтынньы 15 күнүгэр диэри гирииби утары быһыыны туруорарга сорудахтаата.
Ону тэҥэ, ыйаахха СӨ кылаабынай судаарыстыбаннай санитарнай бырааһын этиилэригэр олоҕуран, оскуола иннинээҕи, алын, орто, улахан кылаас, орто анал үөрэх тэрилтэлэригэр үөрэҕи тэрийэргэ COVID-19 тарҕаныытын утары миэрэлэри ылыыга СӨ үөрэҕин уонна наукатын министиэристибэтигэр, улуустар уонна куорат уокуруктарын баһылыктарыгар, үөрэх тэрилтэлэрин салайааччыларыгар туһаайыллыбыт сорудахтар ыйыллаллар.
“СӨ 2020-2021 үөрэх дьылыгар үөрэҕи тэрийиигэ коронавирус тарҕаныытын утары миэрэлэр тустарынан” СӨ Ил Дарханын ыйааҕын тиэкиһин сиһилии манна https://www.sakha.gov.ru/news/front/view/id/3208095 билсиэххитин сөп.
СӨ Ил Дарханын уонна СӨ Бырабыыталыстыбатын пресс-сулууспата.