Бүгүн, ахсынньы 1 күнүгэр, “Кыһын Саха сириттэн саҕаланар” бэстибээл чэрчитинэн өрөспүүбүлүкэ киин куоратыгар Саҥа дьыллааҕы харыйа уотун уматтылар. Бырааһынньыкка Саха сирин тымныытын баһылыга Чысхаан кытынна.
Саха сирин уонна атын эрэгийиэннэр олохтоохторо бу үөрүүлээх түгэни онлайн көрдүлэр, “Саха” НКИК, “Якутия24” ханааллара көрдөрдүлэр.
Саҥа дьыллааҕы сүрүн харыйа уотун Чысхааны кытта Айсен Николаев уматта.
“Бүгүн халандаарынан ахсынньы 1 күнэ, кырыа кыһын дьиҥнээхтик кэллэ, уонна бу Саха сириттэн саҕаланар. Онус төгүлүн бэлиэтэнэр бэстибээл үтүө үгэһинэн биһиги Саҥа дьыллааҕы харыйалары уматабыт уонна бу эстафетаны муҥура биллибэт дойдубут атын куораттарыгар биэрэбит! Онон биһиги дьикти алыптаах бырааһынньыгы чугаһатабыт”, — диэтэ өрөспүүбүлүкэ баһылыга Айсен Николаев.
Саха сиригэр кыһын кэлбитинэн Чысхаан уонна Улуу Устюгтан бэйэтин резиденциятыттан Тымныы оҕонньор эҕэрдэлээтилэр.
Трансляцияны көрөөчүлэр Саха сирин араас куораттарыгар уонна оройуоннарыгар харыйа уотун көрдүлэр. Эфиргэ Тымныы оҕуһун уонна Сайсары Куо, Умсуура уонна Люция муусукаалынай нүөмэрдэрин көрдүлэр.
Санаттахха, “Кыһын Саха сириттэн саҕаланар” Бүтүн Арассыыйатааҕы бэстибээл өрөспүүбүлүкэҕэ онус төгүлүн ыытыллар уонна бу иккис сылын субуруччу онлайн-көрүҥүнэн ыытыллар. Бэстибээлгэ Саха сирин норуоттарын кыһыҥҥы этническэй таҥастарын “Саха кыһынын сылааһа” хаартыска куонкуруһа, “Үрүҥ көмүс хатырык” уус-уран оҥоһуктар быыстапкалара, “Саха сирин амтаннаах аһа” гастрономия бэстибээлэ, муус оҥоһуктар куонкурустара ыытыллар.
Уонна “Саха моржтарын сөтүөлээһиннэрэ, “The Snow Queen in Yakutia” арт-шоу буолла.
Саха Өрөспүүбүлүкэтин Ил Дарханын уонна Саха Өрөспүүбүлүкэтин пресс-сулууспата
Андрей Сорокин уонна Мария Васильева (СИА) түһэриилэрэ
Бэлэмнээтэ Женни Стрюкова.