Бу күннэргэ Саха сиригэр Бүтүн Арассыыйатааҕы судаарыстыбаннай тэрилтэлэр профсойуустарын бэрэссэдээтэлин солбуйааччы Ольга Шелобанова кэлэн үлэлии сылдьар. Кини бүгүн СӨ Ил Дарханын уонна бырабыыталыстыбатын дьаһалтатын салайааччытын Афанасий Владимировы кытары көрүстэ.
Мунньах кэмигэр Ольга Шелобанова үлэһиттэр бырааптара күөмчүлэммэтин көрүү, үлэлэр бары өттүнэн куттала суох буолуохтаахтарыгар, үлэһиттэр доруобуйаларыгар сүрүн болҕомто ууруллуохтааҕын бэлиэтээтэ. Онуоха хамсык кэмигэр ыраахтан олорон үлэни тэрийии, дьаҥтан-дьаһахтан үлэһиттэри харыстааһын сүрүн миэстэни ылыахтааҕын эттэ.
Санатан эттэххэ, Саха сиригэр барыта 190 тыһыынчаттан тахса профсойуус чилиэнэ баар. Билигин улуустар, нэһилиэктэр дьаһалталарын кытары Профсойуус федерацията дьон-сэргэ үлэлиир усулуобуйатын, доруобуйатын көрүүгэ дуогабар түһэрсэ сылдьаллар. Афанасий Владимиров бэлиэтээбитинэн, өрөспүүбүлүкэ үрдүнэн судаарыстыбаннай уонна муниципальнай сулууспа үгүс үлэһитэ быһыыны ылбыт. Билигин СӨ Ил Дарханын уонна бырабыыталыстыбатын дьаһалтатын 83 % номнуо быһыыны ылан олорор.
Мунньах түмүгэр Ольга Викторовна профсойуус ыытар үлэтэ барыта бара турарын бэлиэтээтэ. Санатан эттэххэ, бу күннэргэ Дьокуускай куоракка профсойуустар Уһук Илин эрэгийиэннээҕи семинардара буолуоҕа. Бурятияттан, Приморьеттан, Хабаровскайтан, Хабайкальеттан, Сахалинтан, Амуртар дэлэгээссийэлэр кэллилэр.
Аграфена КУЗЬМИНА