Маны аах Тырааныспар

Саха сиригэр паромнар үлэлэрин кэтиир сыһыарыыга бары тиэйээччилэри холбуохтара

“Саха сирин паромнара” («Паромы Якутии») мобильнай сыһыарыыны киллэрии боппуруоһун Саха Өрөспүүбүлүкэтин Бырабыыталыстыбатын Бэрэссэдээтэлэ Андрей Тарасенко ыыппыт мунньаҕар дьүүллэстилэр.

Сыһыарыы паромунан туорааһын үлэтин көрдөрүөҕэ, манна паромнар тохтуур сирдэрэ уонна сырыыларын араспысаанньата көстүөҕэ. Сыһыарыы билигин тупсарылла сылдьар.

Паромнартан чахчылар сыһыарыыга хапытаан будкатыгар холбоммут трекер нөҥүө эбэтэр “ӨӨХП” ПАУо ситимин сыһыарыытын нөҥүө киирэллэр. “Дьокуускай-Аллараа Бэстээх” туорааһыныгар 13 паромтан тиһиккэ 7-тэ, “Хачыкаат-Мохсоҕоллоох” туорааһыныгар 5-тэн 1 паром холбоммут буоллахтарына, “Кангалассы – Оҕуруоттаах” туһаайыыга биир да паром холбоно илик.

Быйыл бары паромнар холбоноллоро күүтүллэр.

“Пассажирдар бары паромнарга сыһыаннаах чахчылары көрүөхтээхтэр. Өскөтүн тиэйээччилэртэн ким эмэ холбоммотоҕуна, паром тиэйиигэ көҥүллэниэ суоҕа”, — диэн Андрей Тарасенко бэлиэтээтэ.

Трекердэр ахсааннарын уонна көрүҥнэрин быһаарарга паромнар сылдьар туһаайыыларыгар мобильнай сибээс баарын бэрэбиэркэлиэхтэрэ.

Билигин Дьокуускайга паромнар тохтуур биричээллэригэр — “РЦИТ” тэрилтэ 7 хаамырата, Аллараа Бэстээххэ – “Ростелеком” 9 хаамырата туруоруллубуттар. Бу ыйга “Дьокуускай-Аллараа Бэстээх” биричээлин көрөргө эбии хаамыра туруоруллуоҕа.

Сотору кэминэн өрөспүүбүлүкэҕэ үлэлиир уу тырааныспарын бары интэриэстээх биэдэмистибэлэрин уонна тэрилтэлэрин кыттыылаах уунан туоратыы боппуруостарын дьүүллэһиэхтэрэ.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Бэлэмнээтэ Женни Стрюкова

Хаартыска: тустаах саайтан.

0
1