Быйыл Арассыыйа үрдүнэн Экология уонна ураты харыстанар сир-уот сылынан, Ямало-Ненецкэй автономнай уокуруктан Булуҥ улууһугар овцебыктары аҕалаары бэлэмнэнэллэр. Бу анал бырайыак быһыытынан өссө 2015 сылтан саҕаламмыта.
«Запсибгазпром» ААУо быһаччы көмөтүнэн, үп көрүллэн, овцебыктары тутууттан саҕалаан, тиэйэн аҕалыытын боппуруоһа барыта быһаарыллыбыт. Бырайыак түһүмэхтэринэн ыытыллан, быйыл балаҕан ыйыгар түмүктэниэҕэ.
Атырдьах ыйын саҥатыгар Ямало-Ненецкэй уокурукка баар Полярнай-Уральскайдааҕы айылҕа пааркатыгар көҥүл көччүйэ сылдьар биэс ыйдаах 15 уонна балтараалаах сэттэ овцебыгы тутуохтара. Эрдэтээҥи быраактыка көрдөрөрүнэн, эдэр овцебыктар тимир көлөнөн ыраах айаны быдан тулуйаллар эбит.
Балаҕан ыйыгар кыыллары тиэйэн аҕалан, Булуҥ улууһун сиригэр-уотугар ыытыахтара.
Учуонайдар быһаарыыларынан, XXII үйэ саҕаланыытыгар өрөспүүбүлүкэ туундаралаах эргимтэтигэр 150 тыһ. төбөҕө диэри үөскүүрэ күүтүллэр. Ол эбэтэр, 30-40 тыһ. овцебыгы бултуохха сөп буолар. Ити 4000 тонна эккэ тэҥнэһэр. Итиччэ эти ыларга 100 тыһ. кыыл таба бултаныллыан наада.
Кылгас ыспыраапка
1996 сылтан 2002 сылга диэри СӨ айылҕа харыстабылын министиэристибэтин биологическэй ресурсаларга Департаменын көҕүлээһининэн, Таймыыр уокуругуттан сэттэтэ төхтүрүйэн аҕалан, Саха сирин туундаратыгар 94 овцебык ыытыллыбыта. 2009, 2010 уонна 2014 сылларга үлэ салҕанан, 74 кыыл эбии аҕалыллыбыта.
Бүгүҥҥү күҥҥэ 2600 овцебык Аллайыаха, Анаабыр, Булуҥ уонна Аллараа Халыма улуустарыгар үөскээн-төрөөн сылдьара бэлиэтэнэр.
Александр ТАРАСОВ, «Саха сирэ» хаһыат, edersaas.ru