Саха сиригэр кэлэр кыстыкка бэлэмнэниигэ хомунаалынай хаһаайыстыба үлэһиттэрэ төһө бэлэмнээхтэрий? Туох үлэни ыыттылар?
Нэһилиэнньэлээх пууннарга оттугу тиэйэллэр, хочуолунай, тэрил өрөмүөнэ ыытыллар, саахал тахсар түгэнигэр туһаныллар саппааһы бэлэмнииллэр. Ону тэҥэ хомунаалынай комплекс эбийиэктэрин баһаартан куттал суох буолуутун ирдэбиллэригэр бэрэбиэркэлииллэр. Оттук сезонугар эбийиэктэри бэлэмнээһин билиҥҥи туругунан 40 бырыһыаҥҥа тэҥнэһэр.
Сүрүн болҕомтону халаантан эмсэҕэлээбит оройуоннарга уураллар. Чуолаан, Дьааҥы уонна Кэбээйи оройуоннарыгар. Саха сирин баһылыга бу иннинэ кыстыкка эбийиэктэри бэлэмнээһини балаҕан ыйын 1 күнүгэр диэри хааччыйаларыгар, ититии ситимин чөлүгэр түһэрэллэригэр сорудахтаабыта.
СӨ ОДьКХ министиэристибэтигэр чопчулаабыттарынан, 2022-2023 сыллардааҕы оттук сезонугар 1164 хочуолунайы, 4858 км ититэр ситими, 1531 км уу ситимин, 762,5 км канализация ситимин бэлэм оҥоруохтара. Ону сэргэ 2022 сылга 25 хочуолунайы үлэҕэ киллэриэхтэрэ.
Навигация түмүктэниэр диэри 540 тыһ. туонна оттугу илдьиэхтэрэ. Итинтэн 239 тыһ. туоннаны (44 быр.) тиэйэн, анал тиэрдиллиэхтэх сиригэр 173 тыһ. туонна сүөкэннэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Хаартыска: тустаах саайтан
Бэлэмнээтэ Женни Стрюкова.