Саха сиригэр оскуолаларга саҥа миэстэни таһаарыыга эбии үбүлээһин көрүллүөҕэ
Саха Өрөспүүбүлүкэтин оскуолаларыгар саҥа миэстэ таһаарыытыгар анаан дойду хааһынатыттан эбии 93,8 мөлүйүөн солкуобай көрүллүөҕэ. Тустаах дьаһалга РФ Бырабыыталыстыбатын Бэрэссэдээтэлэ Михаил Мишустин илии баттаата. Үбүлээһин быйыл киириэхтээх.
СӨ Бырабыыталыстыбатын Бэрэссэдээтэлин эбээһинэһин толорооччу Сергей Местников иһитиннэрбитинэн, көрүллэр үп 150 оҕо үөрэнэр Мэҥэ Хаҥалас улууһун Балыктаах оскуолатын тутуутун түмүктээһиҥҥэ барыаҕа. Эбийиэк уопсай суумата 307,4 мөлүйүөн солкуобайга тэҥнэһэр. 2020 сыл сэтинньи 3 күнүнээҕи туругунан, оскуола тутуутун 72,5 % бэлэм. Быйыл ахсынньыга үлэҕэ киллэрэр былааннаахтар.
“Үбүлээһин “Үөрэх” национальнай бырайыак “Аныгы оскуола” федеральнай бырайыак иитинэн көрүллэр. “Үөрэх” национальнай бырайыак олоххо киирэн, уопсай уонна анал үөрэхтээһин саҥа эбийиэктэрин тутабыт, саҥа, аныгы тэрилинэн материальнай-тиэхиньиическэй баазаны саҥардабыт.
Дойду бырабыыталыстыбата 2020 сылга эбии үбүлээһини көрүүгэ сайаапканы талыыны биллэрбитэ. Үбүлээһини көрөр туһунан СӨ Ил Дархана Айсен Николаев илии баттааһыннаах сурук балаҕан ыйын 1 күнүгэр РФ Үөрэҕириигэ министиэристибэтигэр барбыта. Сүүмэрдээһин кэнниттэн биһиги өрөспүүбүлүкэбит үтүө быһаарыылаах түмүгү ылбыта. Маныаха РФ Үөрэҕириигэ министиэристибэтин салалтатыгар махталбытын биллэрэбит. Биһиги сүрүн сорукпут – оҕоҕо биир тэҥ кыаҕы биэрии. Өрөспүүбүлүкэ хас биирдии оҕото төһө даҕаны ыраах олорбутун иһин хаачыстыбалаах үөрэҕи ылыахтаах”, — диэн Сергей Местников этэр.
Бэлиэтээн аастахха, субсидияны Саха сирэ, Краснодарскай кыраай, Иркутскай, Свердловскай уонна Челябинскай уобаластар ылыахтара. Федеральнай үп көмөтүнэн сыл түмүктэниэр диэри тустаах эрэгийиэннэргэ эрдэ былааннаммытын таһынан эбии 3600 миэстэ тахсыаҕа. Саха сирин оскуолаларыгар 1080 миэстэни таһаарыахтара.
СӨ Ил Дарханын уонна Бырабыыталыстыбатын пресс-сулууспата.