Доруобуйа Сүрүн

Саха сиригэр «омикроҥҥа» сутуллуу бэлиэтэннэ

Бу чааска Саха сиригэр «омикрон» штаммыгар сутуллуу бастакы түгэнэ бэлиэтэннэ диэн Ил Дархан Айсен Николаев «Телеграм» ханаалыгар иһитиннэрдэ. Онон коронавируһу бохсууга суһал ыстаап мунньаҕа ыытылынна.

«Омикрон» штаммынан сутуллубут киһи Турцияттан сынньанан кэлбит. Кини кимнээҕи кытта хантаактаспыта быһаарыллыбыт. Билигин анаалыстары хомуйаллар.

«Билигин балаһыанньа хайдах баҕар уларыйарыгар бэлэм буолуохха наада», — диэн Айсен Николаев суруйар уонна маннык соруктары туруорда:

— хааччахтыыр эбии миэрэлэри ылынар туһунан ыйааҕы бэлэмнииргэ, бастатан туран, Дьокуускай куоракка;

— ыарыыны эрдэттэн быһаарар туһуттан тестированиены киэҥник ыытарга;

— ыарыыны утары миэрэлэри ылынарга, ол иһигэр нэһилиэнньэни кытта үлэни;

— быһыыны ылбатах дьон ыараханнык ыалдьар, эрдэ да оннук этэ. Онон быһыыны ылыыны тэтимирдэргэ;

— үөрэх тэриллиилэригэр хонтуруолу күүһүрдэргэ;

— дезинфекция, мааска эрэсиимэ, термометрия, ОРВИ сибикилээх дьон бэйэни хааччахтаналларын ирдиири — барытын тутуһарга;

— үлэни тэрийээччилэр үлэһиттэрин доруобуйаларын туругун көрүөхтээхтэр, ыарыы сибикитэ билиннэ даҕаны хааччахтыырга;

— call-кииннэр тохтоло суох үлэлииллэрин тэрийии;

—  «суһал көмө» биригээдэлэрэ эбии тырааныспарынан хааччыллыахтаахтар.

СИА хаартыската.

0
1