Бу өрөбүлгэ, от ыйын 17 күнүгэр, Дьокуускай куорат Комсомольскай болуоссатыгар норуоттар төрүт үгэстэрин, култуураларын үйэтитээччилэр, тарҕатааччылар түмсүөхтэрэ.
Суолталаах тэрээһин быйыл Арассыыйаҕа ыытыллар норуоттар култуурунай нэһилиэстибэлэрин сылыгар ананар. Өрөспүүбүлүкэтээҕи Норуот айымньытын дьиэтин көҕүлээһининэн өрөспүүбүлүкэ улуустарыттан Арассыыйа норуоттарын фольклорун көрүҥнэрин харыстыыр, уйэтитэр, иһитиннэрэр-биллэрэр соруктаах талааннаах толорооччулар, кэлэктииптэр кыттыахтара.
В.Д. Поленов аатынан Судаарыстыбаннай Арассыыйатааҕы норуот айымньытын дьиэтин көҕүлээһининэн сыл аайы от ыйын 17 күнүгэр дойду үрдүнэн Фольклор күнэ бэлиэтэнэр.
Сергей Семенов салайар өрөспүүбүлүкэтээҕи Норуот айымньытын дьиэтин кэлэктиибэ бу тэрээһини сыл аайы өйөөн тэрийэр. Быйыл суолталаах сылга фольклор бэстибээлэ өссө улахан суолталанан, бырааһынньык курдук ыытыллыаҕа.
Онон өрөбүл күн Саха сиригэр олорор норуоттар фольклордарын кытта кэлэн билсиҥ, элбэҕи билиҥ, сынньалаҥҥытын туһалаахтык атаарыҥ.
Елена ПОТОЦКАЯ, «Саха сирэ» хаһыат.