Уопсастыба

Саха сиригэр олорор дьиэни тутуу тэтимириэҕэ

2021 сылга өрөспүүбүлүкэҕэ 570 тыһыынча кв.м. иэннээх олорор дьиэ тутуллуоҕа. Бу бырыыҥҥы сыллааҕар 40 тыһыынчанан элбэх. Бу туһунан СӨ тутууга миниистирэ Павел Кылатчанов СИА «Саха сирэ 21-с үйэ 20 сылыгар» анал бырайыак чэрчитинэн ыытыллар үлэни билиһиннэрдэ.
Миниистир бу сыыппаранан чахчы «Олорор дьиэ» федеральнай бырайыакка былаан быһыытынан киирбитин бэлиэтээтэ. Онон бу холобур быйыл былааҥҥа эрэ буолбакка, олоххо киирэн бигэргэниэ.
Павел Кылатчанов маны таһынан, сыл саҥатыттан Саха сиригэр 200 миэстэлээх үс оҕо уһуйаана үлэҕэ киирбитин иһитиннэрдэ. «Быйылгы сылга 1550 миэстэлээх 11 оскуола, 2090 миэстэлээх 16 уһуйаан уонна 2 эбии үөрэхтээһин тэрилтэлэрэ үлэҕэ киириэхтэрэ. 21 үйэ 20 сылыгар Саха сиригэр 8 мөлүйүөнтэн тахса квадратнай миэтэрэ иэннээх олорор дьиэ тутуллан үлэҕэ киирдэ. Тутуу кээмэйин улаатыытын төрүөтэ — ипотека кирэдьиитин хото туһаныы. Кэлиҥҥи 10 сылга ипотека кирэдьиитэ 15 төгүл улаатта. Аҥардас былырыыҥҥы сылга олорор дьиэ атыытыгар өрөспүүбүлүкэ олохтоохторо 14198 кирэдьиит докумуонун толорбуттара», – диэн эттэ тутуу миниистирэ.

«Биһиги иннибитигэр олорор дьиэни тутуу ырыынагын тэтимнээхтик сайыннарыы соруга турар. Ипотекаҕа дьон интэриэстээх, бааннарга үгүс сайаапка киирэр», – диэн Ил Дархан Айсен Николаев бэлиэтээн турар. Өрөспүүбүлүкэҕэ Аҕа баһылыга тутааччылар сыананы үрдэппэттэрин туһугар бырабыыталыстыба хонтуруолга ылан, тустаах үлэни ыытар.

Елена ПОТОЦКАЯ, «Саха сирэ» хаһыат, edersaas. ru

0
0