Туһааннаах сервис хомунаалынай өҥөҕө хайдах дьайыаҕай?
“Уоту кэмчилээһин уонна СӨ энергетическэй көдьүүһү үрдэтии туһунан” СӨ сокуонугар уларыйыылары иккис уонна бүтэһиктээх ааҕыытыгар ылыннылар. Бу олорор дьиэ пуондатыгар энергосервис дуогабардарын түһэрсиини көрөр.
Туһааннаах көннөрүүлэр олорор дьиэлэргэ уоту кэмчилиир тэрээһиннэри ыытыыга энергосервис хампаанньаларын кытыннарар кыаҕы биэрэр. Маныаха олохтоохтор тустаах хантараактары түһэрсэллэригэр ханнык да ороскуоту сүкпэттэр. Уонна хомунаалынай өҥө төлөбүрүгэр үтүө сабыдыаллаах буолуон сөп.
Үбү-харчыны төнүннэриини энергосервис хампаанньалара нэһилиэнньэҕэ хомунаалынай өҥөлөргө анаан чэпчэтиилээх тарыыптары олохтооһунунан сибээстээн, тарыыптар икки ардыларынааҕы араастаһыыга көрүллэр хомунаалынай өҥөлөрү уонна субсидиялары кэмчилээһин суотугар ылаллар.
Энергияны кэмчилиир тэрээһиннэргэ анал сылытар пууннары туруоруу, олорор дьиэлэр тас өттүлэрин халыҥатыы, дьиэҕэ-уокка сыһыаннаах баайга-дуолга (түннүк, аан) уо.д.а. киирэллэр.
2019 сылтан ыла СӨ ОДьКХ уонна энергетика министиэристибэтэ бырайыактыыр бырайыак чэрчитинэн “Генерация-тиһик-туһанааччы” бириинсипкэ олоҕуран тэрээһиннэри ыытар. Бу көмөтүнэн элбэх кыбартыыралаах 140 дьиэ бүтүннүүтэ учуоттуур тэрилинэн уонна автоматизированнай тус ититэр пууннарынан (АИТП) хааччылынна. Туһааннаах тэриллэр көмөлөрүнэн бу дьиэлэргэ 18866 Гкал кэмчилээһин таҕыста эбэтэр нормативтан 18 бырыһыан.
СӨ ОДьКХ уонна энергетика министиэристибэтин пресс-сулууспатын матырыйаалынан
Бэлэмнээтэ Женни Стрюкова
Хаартыска: тустаах саайтан