Саха сиригэр олохтоох сибиинньэ этин оҥорон таһаарыыны улаатыннарыахтара
“Туймаада” агрохолдинг билиҥҥи баар сибиинньэ иитэр комплекс кыамтатын улаатыннарыаҕа. Өрөспүүбүлүкэ нэһилиэнньэтин олохтоох оҥорон таһарыы бородууксуйатынан хааччыйарга аныгылыы сыахтар тэриллиэхтэрэ. Бу туһунан “Хатастааҕы сибиинньэ комплекса” ХЭТ-кэ сырыытын түмүгүнэн Саха сирин бырабыыталыстыбатын бэрэссэдээтэлэ Андрей Тарасенко иһитиннэрдэ, — диэн СИА-ҕа эрэгийиэн Ил Дарханын уонна Бырабыыталыстыбатын пресс-сулууспата иһитиннэрдэ.
“Арҕааҥҥы сааҥсыйалар кэмнэригэр экэниэмикэни туруктаах оҥорууга ас-үөл куттала суох буолуута дьоһун суолталаах. Манна сүрүннээн тыа хаһаайыстыбатын тэрилтэлэрин туруктаах үлэтэ улахан суолталаах”, — диэбитэ бу иннинэ Саха сирин баһылыга Айсен Николаев.
Хатастааҕы сибиинньэ комплексыгар икки производственнай сыахтаах – төрүөҕү биэрэр уонна уотар. Сыллата сыахтарга 520-530 туонна сибиинньэ этин соҕотуопкалыыллар. 2022 сылга былаан – 522 туонна.
Тыа хаһаайыстыбатын миниистирэ Александр Атласов бэлиэтииринэн, сибиинньэ иитии отуттан тахса сыллааҕыта саҕаламмыта уонна материальнай-тэхиньиичэскэй баазата саҥардыыны эрэйэр. Производствоны кэҥэтиигэ сир тиийбэт – комплекс икки өттүттэн кыракый үрэхтэр бааллар. Аныгы ирдэбилинэн сибиинньэ комплексыгар хас биирдии салааҕа туспа дьиэ-уот баар буолуохтаах. Билигин бары сыахтар биир дьиэҕэ быысаһан тураллар.
Андрей Тарасенко Тыа хаһаайыстыбатын министиэристибэтигэр “Туймаада агрохолдины” кытта бииргэ Мэҥэ Хаҥалас оройуонун сиригэр-уотугар олоххо киллэриигэ этиллибит 5 тыһыынча төбөҕө диэри кыамталаах сибиинньэ комплексын бырайыагынан үлэлииргэ соруйда.
Санатан эттэххэ, 2021 сылга өрөспүүбүлүкэ бүддьүөтүттэн 55 мөл солк. түргэнник ситэр дьиэ кыылын тиэрдиигэ тырааныспар ороскуотун сорҕотун толуйарга анаан оройуоннары өйүүргэ көрбүттэрэ. Ол курдук, олохтоох аграрийдарга 3835 төбө ыччат сибиинньэни тиэрдибиттэрэ, Хатастааҕы сибиинньэ комплекса уонна “Сибиир” ПТКХ хааччыйбыттара.
Салгыы репортажпытын ааҕыҥ:
СИА-тан
Хаартыска: СИА
Бэлэмнээтэ Женни Стрюкова