Саха сиригэр ойуур баһаардара өрөспүүбүлүкэ баһылыгын хонтуруолугар турар

Саха сиригэр ойуур баһаарын тула үөскээбит балаһыанньа өрөспүүбүлүкэ баһылыгын тус хонтуруолугар турар. Бу туһунан Айсен Николаев бэйэтин Instagram-ыгар суруйда. “Өрөспүүбүлүкэҕэ баһаары утары балаһыаньаны олус болҕойон уонна долгуйан кэтиибин. Баһаардары умулларыыга 790 киһи кыттар уонна 84 тиэхиньикэ тардылынна”, — диэн регион баһылыга суруйда.

Айсен Николаев Хабаровскай кыраайтан БЕ-200 сөмөлүөт кэлиитин ойуччу бэлиэтээтэ. Сөмөлүөт Хаҥалас оройуонугар 15 төгүл ууну бырахпыт, салгыы Сунтаар оройуонугар үлэлиир. “Үлэ салҕанар уонна ойуур баһаара мин тус хонтуруолбар турар”, — диэтэ кини.

Санаттахха, РФ бырабыыталыстыбатын бэрэссэдээтэлэ Дмитрий Медведев вице-премьердэри кытта сүбэ мунньаҕар ойуур баһаардарын дьүүллэспитэ уонна губернатордарга бу боппуруоһу тус хонтуруолларыгар ылалларыгар соруйбута. “Балаһыанньа уустук, эрэгийиэн былаастарын, ону тэҥэ федеральнай киин да өттүттэн түмсүүлээх суһал миэрэлэри ирдиир”, — диэбитэ премьер.

Дойду үрдүнэн ойуур баһаардарын иэнэ 2,7 мөлүйүөн гектарга тэҥнэһэр, ити былырыыҥҥытааҕар 12 бырыһыанынан элбэх. Эрэгийиэннэргэ уоту хаптатыыга федеральнай “Авиалесоохрана” үлэһиттэрин тус cастааба бүтүннүү кэриэтэ кыттар.

СИА.