Ойуур баһаардарын балаһыанньатын уонна тустаах ситим бэлэм буолуутун туһунан сүбэ мунньаҕы Саха Өрөспүүбүлүкэтин Бырабыыталыстыбатын Бэрэссэдээтэлин бастакы солбуйааччы Дмитрий Садовников ыытта.
Бүгүн өрөспүүбүлүкэ сиригэр 22 умайыы (термоточка) бэлиэтэннэ. Ол курдук, Муома оройуонун Дьарҕалаах сиригэр Хонууттан 4 км сиргэ ландшафтнай баһаар туран, 4,5 гектар сири уот сиэтэ. Түргэнник дьаһанан хаптаттылар. Төһө да сааспыт уһаатар, хаар түргэнник ууллар, сорох оройуоннарга 10-25 күн нуорматтан эрдэлээн, ону сэргэ тыал күүстээх буолан, уоту тарҕатыан сөп.
Уот туруутугар үксүгэр киһи буруйдаах. Дмитрий Садовников муниципальнай оройуоннар баһылыктарыгар сокуонунан өртөөһүнү бобууну санатта, ол эрээри Муома, Амма, Ньурба оройуоннарыгар дьон сэтиэнэҕи уматаллар. “Нэһилиэнньэҕэ инструктаж ыытыахха, сокуонунан эппиэккэ тардыллалларын өйдүөхтээхтэр”, — диэтэ кини.
Ойуурга рейдэлэри күүһүрдэргэ уонна дьон айылҕаҕа тахсыытын мутукча быгыар диэри хааччахтыырга эттэ. Ону тэҥэ уот линияларыгар ревизия ыытыллыахтаах.
Ойуур (ландшафтнай) баһаардарын умулларыыга түргэнник иһитиннэрии суолталааҕынан 2021 сылга өрөспүүбүлүкэҕэ “Оперативный мониторинг ЧС” ИАС ситиминэн “Ойуур баһаардара” модуль үлэтин саҕалаабыта. Саха сирин Инновацияҕа уонна сыыппара сайдыытыгар министиэристибэтин чахчытынан, бүгүн бу ситим толору бэлэм, үлэһиттэри үөрэтии ыытыллыбыт. Мунньахха бу ситими кэлэр нэдиэлэттэн толору үлэлэтэргэ этилиннэ.
Мунньахха диспетчердэр сулууспаларын үлэтин эмиэ дьүүллэстилэр. Маннык мунньахтар нэдиэлэ аайы буолуохтара.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан