Үөрүүлээх быһыыга-майгыга Дьокуускай куораттааҕы 18-с нүөмэрдээх “Прометейчик” уһуйаан баазатыгар Т.С. Комарова аатынан Оҕо аймах академията аһылынна.
Академия сүрүн соругунан социальнай экэниэмикэни күүскэ тарҕатыы, баар кыаҕы, олохсуйбут быраактыканы үөрэх уонна урбаан эйгэтигэр сөпкө туһаныы буолар.
“Оҕо аймах академията уруккуттан баар идиэйэ. “Айдарыылаах оҕолор” бырайыакка үлэлиир кэлэктиип хас даҕаны сыл илдьэ сылдьыбыт санаабыт санаата буолар. Академия аан дойду бастыҥ каадырдарыгар, уопутугар уонна уопсастыбаннай билимҥэ ирдэбил уларыйыытыгар түргэнник-тарҕаннык дьайан, хардаран, саҥа үөрэх олохсуйуутун систиэмэтигэр үлэлиэҕэ. Кэлэр кэм дьонун бэлэмниир хас биирдиибитин таарыйар экосистиэмэ сорҕотунан буолар сорук турар. Бу үөрэх саҥа ирдэбилин, ыҥырыытын СӨ Үүнэр көлүөнэтин пуондата сайыннарар. Биһиги көрүүбүтүнэн, култуураҕа тирэҕирбит ааспыт уопукка олоҕуран, өрөспүүбүлүкэ бэйэтин уһулуччу суолунан баран иһэр уонна инньэ гынан үөрэх бэйэтин систиэмэтэ тэриллэр”, — диэн РФ Уопсастыбаннай палаататын дойдуга информационнай уопсастыбаны сайыннарыыга оробуочай бөлөҕүн чилиэнэ Ирина Комарова бэлиэтиир.
Онтон СӨ Үүнэр көлүөнэ пуондатын генеральнай дириэктэрэ Владимир Егоров аһаҕас, бииргэ үлэлииргэ бэлэм буолуу оҕо аймах экосистиэмэтэ олохсуйуутугар бастакы хардыынан буолар диэн этэр. “Прометейчик” саҥа таһымҥа тахсар. Тустаах уһуйаан баазатыгар Оҕо аймах академията аһыллыыта, холбоһук түмсэригэр саҥа кыаҕы биэриэҕэ. Саха сирин оҕото барыта эргиччи сайдар кыахтаныаҕа, доруобай, өйдөөх, көхтөөх уонна саамай сүрүнэ дьоллоох көлүөнэни иитэн таһаарыахпыт” – диэн Владимир Егоров ыйар.
Бэлиэ күнүнэн кыттааччылары СӨ үөрэҕин уонна наукатын миниистирэ Михаил Сивцев, СӨ ыччат дьыалаларыгар уонна социальнай коммуникацияларга миниистирэ Степан Саргыдаев, Ил Түмэн дьокутаата Марина Силкина, РФ уопсастыбаннай палаататын чилиэнэ, СӨ Уопсастыбаннай палаататын социальнай бэлиитикэҕэ хамыыһыйатын бэрэссэдээтэлэ Лена Ефремова, Дьокуускай куорат үөрэҕин управлениетын начаалынньыгын эбээһинэһин толорооччу Мирослав Афанасьев эҕэрдэлээтилэр.
Тэрээһин иитинэн “Оҕо аймах үрдүкү уопсастыбаннай сэбиэтин чилиэнэ” бочуоттаах ааты РФ Бырабыыталыстыбатын иһинэн үлэлиир анаалыстыыр киин сүбэһитигэр Инна Каракчиеваҕа, Арассыыйатааҕы наукалар академияларын президиумун иһинэн оҥорон таһаарыыга күүһүн үөрэтэр сэбиэт научнай үлэһитигэр, РФ Уопсастыбаннай палаататын дойдуга информационнай уопсастыбаны сайыннарыыга оробуочай бөлөҕүн чилиэнэ Ирина Комароваҕа уонна Кэммиэрчэскэйэ суох тэрилтэлэр уопсай национальнай сойуустарын бэрэсидьиэнигэр Александр Айгистовка туттардылар.
СӨ Үүнэр көлүөнэ пуондатын пресс-сулууспата.
[vc_images_carousel images=»196196,196195,196194,196193,196192″ img_size=»full»]