Саха сиригэр норуот оҥоһуктара “Үлэ кыбартаала” креативнай кластер сүрүн хайысхаларыттан биирдэстэринэн буолуохтара
“Үлэ кыбартаала” креативнай кластер сүрүн хайысхаларыттан биирдэстэринэн норуот оҥоһуктара буолуохтара. Бу туһунан өрөспүүбүлүкэ Бырабыыталыстыбатын Бэрэссэдээтэлин солбуйааччы Сергей Местников салалтатынан Кэнсиэпсийэни ырытыы кэмигэр кэпсэттилэр.
Саха сирин баһылыга Айсен Николаев “Үлэ кыбартаалын” тэрийиини 2022 сыл муус устар ыйыгар түмүктүүргэ сорук туруорбута. Киэҥ хабааннаах бырайыагы үлэлэтии өрөспүүбүлүкэ 100 сылын сүрүн тэрээһиннэриттэн биирдэстэринэн буолуоҕа. Бырайыагы федеральнай киин өйөөбүтэ, экэнэмиичэскэй сайдыы кииннэрин социальнай сайдыыларын былаанын чэрчитинэн дьиэни саҥардан оҥорууга 412 мөл солкуобай суумалаах “Биир кэлим субсидия” киирбитэ.
Креативнай кластер сүрүн соруга – бэйэ-бэйэлэрин ситэрсэр биисинэстэри түмэн, сири-уоту уонна эйгэни сайыннарарга. “Үлэ кыбартаала” “куораттар куоракка” бириинсибинэн салайтараллар – олорорго, үлэлииргэ, сынньанарга сөптөөх инфраструктуралаах буолуохтаахтар. Саха сирин сайдыытын корпорациятын генеральнай дириэктэрэ Афанасий Саввин этэринэн, креативнай индустрия ханнык баҕарар хампаанньата кластер резиденин статуһун ылыан сөп.
Сергей Местников бэлиэтииринэн, бүгүн Саха сирин норуот маастардарын оҥоһуктара үгүстүк быыстапкаларга туруоруллаллар, оттон сорук турар – бу оҥоһуктары үпкэ-харчыга кубулутуу, балары дойду уонна норуоттар икки ардыларынааҕы ырыынактарга таһаарыы. Маныаха норуот талааннаахтарыгар бородууксуйалара күрэстэһэр кыахтанарын туһугар көмөлөһүү эрэйиллэр. Вице-премьер кластер салалтатыгар араас хайысхаларга үлэлиир маастардары кытта көрсөн, Креативнай кластер кэнсиэпсийэтин ситэрэн-хоторон биэрэллэригэр сорудахтаата.
Санатан эттэххэ, Саха сирэ Креативнай экэниэмикэ сайдыытын кэнсиэпсийэтэ торумнаммыт уонна ылыныллыбыт дойду бастакы эрэгийиэнэ буолар. “Үлэ кыбартаала” Арассыыйаҕа креативнай индустрияны сайыннарыыга бастакы ТОР тиэргэнинэн буолар. Бу кластер аһылыннаҕына 1250 үлэ миэстэтэ тэриллиэҕэ. Резиденнэринэн 150-ча тэрилтэ буолуоҕа.
Сахаговтан
Хаартыска: тустаах саайтан
Бэлэмнээтэ Женни Стрюкова