Саха сиригэр нэһилиэнньэ дьарыктаах уонна социальнай көмүскэллээх буоларыгар эбии миэрэлэри ыллылар
Саха сирин Ил Дархана Айсен Николаев үлэ ырыынагын уонна кыра дохуоттаах нэһилиэнньэни өйүүр боппуруостарынан суһал ыстаап мунньаҕын ыытта.
«Арҕааҥҥы дойдулар санкциялара нэһилиэнньэҕэ уонна үлэ миэстэтигэр дьайбаттарын туһуттан дойду бырабыыталыстыбата туох баар миэрэлэри ылынар. Өрөспүүбүлүкэ таһымыгар гражданнар эбии социальнай өйөбүллээх уонна дьарыктаах буолууларыгар аадырыстаах быһаарыныылар ылыналлар,» — диэн Айсен Николаев эттэ.
Өрөспүүбүлүкэ салайааччыта 8-16 саастаах оҕолордоох кыра дохуоттаах ыалларга төлөбүр киирэр мэхэньиисимин толкуйдуурга соруйда. Санатан суруйдахха, кулун тутар 8 күнүгэр РФ Бэрэсидьиэнэ Владимир Путин муус устар 1 күнүттэн саҥа төлөбүрдэр киирэллэрин туһунан биллэрбитэ. Бу сыалларга 6 380,4 мөлүйүөн солкуобай федеральнай бүддьүөттэн, 412 мөлүйүөн солкуобай өрөспүүбүлүкэ бүддьүөтүттэн көрүллүөҕэ.
Өрөспүүбүлүкэ парламеныгар «Дьиэ кэргэн» диэн өрөспүүбүлүкэтээҕи ийэ хапытаалын харчытыттан 30 тыһыынча солкуобайы суһаллык туттарга наада буоллаҕына туһанар туһунан сокуон бырайыага киириэҕэ. Бу сэртипикээти өрөспүүбүлүкэҕэ үһүс оҕоломмут ыал туһанар.
Маны сэргэ 2022 сыл кулун тутар 1 күнүттэн үлэтэ суох хаалбыт дьоҥҥо уонна кыра дохуоттаах дьоҥҥо материальнай көмө көрүллэр. Маны кытта соцкхантараагынан социальнай көмө кээмэйэ эмиэ улаатыаҕа: урбаанынан дьарыктанарга — 300 тыһыынча солкуобайга тиийэ, хаһаайыстыбалаахтарга — 250 тыһыынча солкуобайга тиийэ.
Ил Дархан уонна Бырабыыталыстыба дьаһалтатын пресс-сулууспата.
Андрей Сорокин хаартыската.