Саха сиригэр научнай-технологическай инновационнай киини оҥорор былаан баар
Уһук Илин уонна Арктика сайдыытыгар РФ миниистирэ Алексей Чекунков Саха сиригэр научнай-технологическай инновационнай киин тэриллэрин өйөөтө.
«Саха сирэ айти салааҕа Уһук Илиҥҥэ лиидэр буолар. Оттон биһиги эрэгийиэн позициятын бүтүн Азиатскай-Тихоокеанскай эрэгийиэн IT-сыанатыгар күүһүрдэр кыах баарын көрөбүт. Маныаха Хотугулуу-Илиҥҥи федеральнай университет, ДВФУ, Тихоокеанскай судаарыстыбаннай университет күүс буолаллар. Биһиги Русскай островка баар Инновационнай-технологическай киин курдук үрдүк технологиялаах бырайыактары сайыннарабыт. Саха сиригэр маннык киин тэриллэригэр туох баар усулуобуйа баар», — диэн суруналыыстарга Алексей Чекунков эттэ.
Бүгүҥҥү күҥҥэ Арассыыйа үрдүнэн түөрт маннык киин баар: Сочига «Сириус», Москваҕа «Воробьёвы горы», «Долина Менделеева» уонна Владивостокка «Русский». Кинилэр үлэлэрэ «Об инновационных научно-технологических центрах и о внесении изменений в отдельные законодательные акты Российской Федерации» диэн 29.07.2017 сыллаахха тахсыбыт 216-с №-дээх Федеральнай сокуонунан мэктиэлэнэр.
Ил Дархан уонна Бырабыыталыстыба дьаһалтатын пресс-сулууспата.