Бэлиитикэ Сүрүн

Саха сиригэр Максим Аммосов 125 сылыгар бэлэмнэнэллэр

Ыам ыйын 13 күнүгэр СӨ ИЛ Дарханын уонна СӨ Бырабыыталыстыбатын Дьаһалтатын салайааччыта Афанасий Владимиров сүҥкэн судаарыстыбаннай уонна уопсастыбаннай диэйэтэл М.К.Аммосов төрөөбүтэ 125 сылыгар анаммыт тэрээһиннэри бэлэмнээһиҥҥэ уонна ыытыыга анаммыт сүбэ мунньаҕы ыытта.

2020-2022 сылларга үбүлүөйдээх тэрээһиннэр былааннарын уонна ороскуоттарын сметатын туолуутун боппуруоһа көрүлүннэ. Былаан 51 пуунтан турар, үлэ 44 пуунунан ыытыллар.

Сүрүн иһитиннэриини Нам улууһун баһылыга Юрий Слепцов оҥордо.

Улуус баһылыга Былаан чопчулааһыны эрэйэр сорох пууннарыгар тохтоото. Чуолаан, Хатырыкка диэри суолу аспааллааһыҥҥа. Уонна оскуола хапытаалынай өрөмүөнүн ыытыыга.

Хас биирдии пууну анаан көрдүлэр, ким эппиэтинэһи сүгэрин быһаардылар.

Ол курдук, Хатырык оскуолатыгар хапытаалынай өрөмүөнү ыытыы РФ “Тыа сирин сирдэрин-уоттарын кэлимсэ сайыннарыы” судаарыстыбаннай бырагырааматын олоххо киллэрии чэрчитинэн федеральнай бүддьүөттэн үбүлээһиҥҥэ Саха Өрөспүүбүлүкэтин түмүллүбүт сайаапкатыгар киирдэ. РФ Тыа хаһаайыстыбатын министиэристибэтин быһаарыытын бу сыл иккис кыбаарталын бүтүүтэ кэтэһэллэр.

Суолу аспааллааһын түһүмэхтэринэн ыытыллар. Былаан быһыытынан 614 мөл солкуобай көрүллүбүт. Былырыын 258 мөл солк. 5 км суолу өрөмүөннээбиттэрэ. Быйыл 353 мөл солк. үлэ күүтүллэр. Улуус салалтата бу пууҥҥа Остуолба бөһүөлэгин иһинээҕи суолун аспааллааһыны киллэрэр боппуруоһу туруорсар.

Ону сэргэ кинигэни таһаарыы, документальнай киинэни устуу, испэктээкили туруоруу, быыстапканы тэрийии, мемориальнай дуосканы саҥардыы уонна Москваҕа пааматынньыгы чөлүгэр түһэрии ыытыллар. Үбүлүөйдээх тэрээһиннэри Кыргызстаҥҥа уонна Казахстаҥҥа ыытарга былаанныыллар. Түмүккэ Афанасий Владимиров үбүлүөй тэрээһиннэрин чопчу толорорго, ыытыллар үлэлэр болдьохторун хонтуруолга тутарга эттэ. “Наада тирээтэҕинэ бу Былааҥҥа киирбит эбийиэктэргэ суолта биэриэххэ”, — диэн бэлиэтээтэ Афанасий Владимиров.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.

0
0