Сүрүн Уопсастыба

Саха сиригэр маай бырааһынньыктарын олохсуйбут көрүҥүнэн ыытыылара тохтотулунна

Өрөспүүбүлүкэ сиригэр-уотугар эпидемиологическай балаһыанньаны учуоттаан быйыл ыам ыйын 1 уонна 9 күннэригэр ыытыллар бырааһынньыктары олохсуйбут көрүҥүнэн ыытыллыылара тохтотулунна. Бу туһунан бүгүн, муус устар 29 күнүгэр, Өрөспүүбүлүкэтээҕи суһал ыстаап мунньаҕар Саха сирин баһылыга Айсен Николаев иһитиннэрдэ диэн кини пресс-сэкирэтээрэ Афанасий Ноев эттэ.

Ноев этэринэн, мунньах кэмигэр өрөспүүбүлүкэ баһылыга билиҥҥи туругунан эпидемиологическай балаһыанньа тупса илигин ааһан ыалдьааччы ахсаана элбээбитэ билиннэ.
Роспотребнадзор Саха сиринээҕи управлениетын чахчытынан муус устар 29 күнүгэр Саха сиригэр ковид-19 саҥа ыалдьыы 95 түгэнэ бэлиэтэннэ. Дьокуускайга -56, Мэҥэ Хаҥаласка -11, Эдьигээҥҥэ — 6, Тааттаҕа — 5, Алдан оройуонугар — 4, Бүлүү уонна Нам улуустарыгар — 3-түү. Маныаха саҥа ыалдьыы 60 бырыһыана Дьокуускайга бэлиэтэннэ, ону тэҥэ өрөспүүбүлүкэтээҕи суһал ыстаабы Мэҥэ Хаҥалас улууһа долгутар. Манна күн ахсын 10-тан 20 диэри дьаҥҥа саҥа хаптарыы бэлиэтэнэр, Аллараа Бэстээххэ эмиэ.
Үөскээбит быһыыны-майгыны өрөспүүбүлүкэ кылаабынай санитарнай бырааһын этиитин болҕомтоҕо ылан коронавирус саҥа дьаҥын Саха сирин сиригэр-уотугар таһаарбат уонна тарҕаппат туһуттан өрөспүүбүлүкэтээҕи суһал ыстаап быһаарыыта ылыллыаҕа.

Ол курдук, ыам ыйын 1 уонна 9 күннэрин бырааһынньыктааһыны олохсуйбут көрүҥүнэн ыытыы тохтотулунна. Маай бырааһынньыктара тэйиччиттэн технологияны муҥутуурдук туһанан ыытыллыаҕа. Бырааһынньыктааҕы фейерверктэр, култуурунай-маассабай уонна аралдьытар тэрээһиннэр өрөспүүбүлүкэ сиригэр-уотугар бүтүннүүтүгэр тохтотуллар.
Муниципальнай уонна биэдэмистибэннэй тэрээһиннэри аһаҕас салгыҥҥа ыытыыга, 1941-1945 сыллардааҕы Аҕа дойду Улуу сэриитигэр кыайыы 76 сылыгар анаммыт тэрээһиннэргэ бэтэрээннэр уонна 65 саастарын ааспыт дьон булгуччулаах кыттыылара көҥүллэммэт. Кинилэр бырааһынньыктааҕы тэрээһиннэргэ тэйиччиттэн көрүҥүнэн кыттыахтаахтар.
Бэтэрээннэргэ бэлэҕи туттарыыга уонна тиэрдиигэ коронавирус дьаҥыттан быһыыны толору ылбыт волонтердар бары санитарнай-эпидемиологическай миэрэлэри — мааскалары, социальнай тэйиччи буолууну туһанан кыттыахтарын сөп.

Айсен Николаев маны сэргэ Бырабыыталыстыбаҕа, СӨ Ил Дарханын уонна Бырабыыталыстыбатын дьаһалтатыгар, муниципальнай тэриллиилэргэ буолаары турар итэҕэл бырааһынньыктарыгар кытаанахтык харыстыыр миэрэлэри тутуһан ыытыыны хааччыйыахтаахтар: социальнай тэйиччи буолууну, дезинфекциялааһыны, дьиэни салгылатыыны, салгыны ыраастыыр тэрили туһаныыны, итэҕэл тэрилтэлэригэр киирэргэ илиини антисептигынан сотторго, таҥара дьиэлэригэр уонна мечеккэ киллэриигэ социальнай тэйиччи буолууну тутуһууга сөптөөх ахсаанынан киллэрэргэ.

Дьокуускай куорат салалтатыгар быйыл ыам ыйын 11 күнүгэр түбэһэр Радуницаҕа дьон кылабыыһаҕа сылдьыыларыгар уопсастыбаннай тырааныспар сырыытын кыраапыгын хааччыйалларыгар, тырааныспар тохтуур сирин хааччыйалларыгар уонна кылабыыһаҕа социальнай тэйиччи буолууну тутуһуннаралларыгар сорудахтанна.

«Былырыын маай бырааһынньыктарын кэннэ өрөспүүбүлүкэҕэ ыалдьааччы ахсаана элбээбитэ, былырыыҥҥы балаһыанньаны хатылаабат туһуттан быйыл бары санитарнай ирдэбиллэри тутуһуохха. Бары сорудахтарга муниципальнай тэриллиилэр уонна куорат уокуруктара, министиэристибэлэр уонна биэдэмистибэлэр, бырабыыталыстыба олус үрдүк эппитинэстээхтик сыһыаннаһыахтаахтар», — диэтэ Айсен Николаев сүбэ мунньахха.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.

Андрей Сорокин хаартыската.

Женни Стрюкова бэлэмнээтэ.

1
0