Саха сиригэр «кыһалҕалаах» алта эбийиэги ситэрэр туһунан боппуруос көтөҕүлүннэ
Өрөспүүбүлүкэ бырабыыталыстыбатын бэрэссэдээтэлин бастакы солбуйааччы Кирилл Бычков Саха сиригэр кыһалҕалаах алта эбийиэги ситэри тутар туһунан боппуруоһу биэдэмэстибэлэр икки ардыларынааҕы оробуочай бөлөх мунньаҕыгар көтөхтө.
2021 c. Кыһалҕалаах эбийиэктэр биир кэлим реестрдарыттан аҕыс эбийиэк испииһэктэн тахсан, 480 киһи бырааба сөргүтүллүбүт. Онон, ааспыт сыл түмүгүнэн, дьиэни өлүүлэһэн туттарыыга албыннаппыт дьон ахсаана 1019-тан 539 киһиэхэ диэри аччаабыт. Бу туһунан Кирилл Бычков: «Строймонтаж-2002” тэрилтэ Дьокуускай куорат Кальвица уулуссатыгар тутуллуохтаах 157 кыбартыыралаах дьиэтин туһунан этэр буоллахха, кыбартыыра атыыласпыт гражданнарга компенсация төлөнүөҕэ. Бүгүҥҥү күҥҥэ маннык төлөбүрү 180 дольщиктан 150 киһи туһаммыт», — диэтэ.
Дьокуускайга 51-с кыбартаалга тутуллуохтаах административнай тутууну “Чороон СК” бүддьүөттэн эбии харчы ылбакка, бу сыл үһүс кыбаарталыгар ситэриэхтээх.
Ону сэргэ, федеральнай пуонда ылыммыт быһаарыытынан, РОФ ПИП “ИИТИИ”, “Монолит Строй”, “Черов и К” (Г -1, U-2 блоктар) тутуулара 2022-2023 сылларга үлэҕэ киллэрэргэ былааннанна.
2021 c. икки эбийиэк үлэҕэ киирдэ. Ол курдук, Дьокуускай куорат Кальвица уулуссатыгар “Стрела” ХЭУо элбэх кыбартыыралаах дьиэтэ уонна “Саха Паркинг” ХЭУо 203 микрооройуоҥҥа автостоянката.
«Сүрүн болҕомтону реестргэ киирэрэ кыһалҕаламмыт эбийиэктэргэ ууруохха наада, бүгүҥҥү күҥҥэ маннык балаһыанньаҕа үс эбийиэк баар. Үлэ хаамыытын сааһылаан, сөптөөхтүк салайыахха наада», — диэтэ Кирилл Бычков.
Ульяна ЗАХАРОВА.