Бүгүн, муус устар 20 күнүгэр Ил Дархан Айсен Николаев коронавируһу утары охсуһуу суһал ыстаап мунньаҕын ыытта.
Эрэгийиэн баһылыга өрөспүүбүлүкэҕэ коронавирус британскай штамма икки киһиэхэ бэлиэтэннэ диэн иһитиннэрдэ. Саҥа штамм Турцияттан сынньанан кэлбит Дьокуускайга олорор дьиэ кэргэҥҥэ бэлиэтэммит. Британскай штамм олус түргэнник тарҕанар буолан, Дьокуускайга куттал суоһуур. Маны таһынан, билигин даҕаны олус элбэх саха дьоно кыраныысса таһыгар сынньана сылдьар, ол иһигэр Турцияҕа. Онон, өрөспүүбүлүкэҕэ саҥа коронавируснай штамм өссө да кэлиэн сөп.
Ил Дархан кыраныысса таһыттан кэлэр дьону хонтуруоллаан, кинилэр кэлээт даҕаны ПЦР-тиэс туттарыахтаахтар диэн иһитиннэрдэ.
Айсен Николаев улуус суһал ыстааптарыгар нэһилиэнньэҕэ иһитиннэрии үлэтин ыытыҥ диэн сорудах биэрдэ. Улууска даҕаны дьиэ кэргэн көрсүһүүлэрин, айылҕаҕа тахсыылары аҕыйатын диэн иһитиннэрдэ.
Ил Дархан хантаак аҕыйыырын туһугар, маасканы кэтэргит, социальнай дистанцияны тутуһаргыт булгуччулаах диэн өссө биирдэ тоһоҕолоон эттэ. Ордук улахан болҕомто үөрэх эбийиэктэригэр ууруохха наада диэн Айсен Николаев бэлиэтээтэ.
Санатар буоллахха, коронавирус утары быһыыны олорор сиргитинэн поликлиникаҕа ылаҕыт.
Виктория Бястинова, edersaas.ru саайт, «Саха сирэ» хаһыат.
Хаартыска ysia.ru