Сүрүн Уопсастыба

Саха сиригэр килиимэти үөрэтэр экспедиция ыытыллыа

Арассыыйатааҕы экологическай уопсастыба килиимэти үөрэтэр экспедицията Саха сиригэр 2022 сыл сайыныгар ыытыллыаҕа. Сүрүн болҕомто ирбэт тоҥ ирэн эрэригэр уонна баһаардар кэннилэриттэн ойуур туругун көрүүгэ-истиигэ ууруллуо. Бу туһунан ТАСС иһитиннэрэр.

Былырыын килиимэти үөрэтэр экспедиция Архангельскай уобаласка үлэлээбитэ. Быйыл баһаар содулун туоратыыны үөрэтэр сыалтан, Саха сиригэр ыытыллыа. Өрөспүүбүлүкэҕэ бу тиэмэҕэ научнай институттары, Наука академиятын, ХИФУ-ну, былаас уорганнарын, парламены, уопсастыбаннаһы кытары киэҥ хабааннаах бииргэ үлэлэһии барыаҕа, — диэн Криолитозона биологическай кыһалҕаларын институтун сүрүн научнай үлэһитэ, биологическай наука дуоктара, Арассыыйатааҕы экологическай уопсастыба эрэгийиэннээҕи салаатын бэрэсээдээтэлэ Михаил Черосов этэр.

Бэс ыйыттан саҕаламмыт экспедиция ирбэт тоҥу, баһаардар содулларын, иһэр уу хаачыстыбатын, экологическай-туристическай маршруттары, бөҕү хомуйууну, о.д.а. үөрэтиэхтэрэ. Учуонайдар Дьокуускай таһыгар, Горнай, Хаҥалас, Чурапчы улуустарыгар үлэлиэхтэрэ.

Былырыын өрөспүүбүлүкэҕэ 1678 ойуур баһаара туран, 9 мөлүйүөнтэн тахса гектаар иэннээх сир умайбыта. Бу Арассыыйаҕа буолар ойуур баһаардарын 90%-рын ылар. 2022 сылга ойууру баһаартан харыстыырга федеральнай бүддьүөттэн көрүллэр үп 5,5 төгүл элбээн, 1,6 миллиард солкуобайга тэҥнэспитэ.

Ангелина Васильева, “Саха сирэ” хаһыат, edersaas.ru

Хаартыска: ykt.ru

0
0
Telegram @edersaas20