Айылҕа харыстабыла Сүрүн

Саха сиригэр искусственнай ардаҕы ыҥырыы эспэримиэнэ түмүктэннэ

Киин аэрологическай обсерватория (Росгидромет) Як-42Д диэн лабаратыарыйа-сөмөлүөтэ Уус Маайа улууһугар бүтэһик көтүүнү оҥордо. Сарсын Москваҕа төннөр. 
Бүгүн СӨ Бырабыыталыстыбатын бэрэссэдээтэлин  1-кы солбуйааччы  Дмитрий Садовников көтөр аал экипаһыгар тустаах үлэни этэҥҥэ толорбуттарын иһин бырабыыталыстыба наҕараадаларын туттартаата. Кини быһааран эппитинэн искусственнай ардаҕы ыҥырыы эспэримиэнэ эһиил салгыы ыытыллыаҕа. «Ойуур баһаардара үөскүүр, турар кутталлаах  кирбиини (кылааһын) намтатыы үлэлэрэ үчүгэй өрүттэрдээҕин көрдөрдө диэн сыаналыыбыт. Эһиил тустаах үлэ салгыы ыытыллыахтааҕын туһунан сорудаҕы Ил Дархан Айсен Николаев биэрдэ», — диэн Дмитрий Садовников эттэ.
Киин аэрологическай обсерватория тутаах отделын начаалынньыга, бөлөх салайааччыта  Баграт Данелян быйыл искусственнай ардаҕы түһэрии ыытыллыбытын түмүгэр, ойуур баһаардара туруулара аччаабытын туһунан иһитиннэрдэ.  «Мин, исписэлиис быһыытынан, маннык ураты эспэримиэни көҕүлээн тэрийбиккитигэр, өрөспүүбүлүкэ салалтатыгар махтанабын.  Искусственнай ардаҕы ыҥырыы түмүгэр,  ойуур сирэ-уота инчэтиллэн, уот туруутун лаппа аҕыйатта. Ыаллыы сытар эрэгийиэннэргэ тустаах үлэ ыытыллыбатаҕын түмүгэр, кинилэргэ ойуур баһаардара туруулара элбэх.  Быйыл ыытыллыбыт эспэримиэн көрдөрүүлэринэн научнай-методическай төрүт оҥоһуллуон наада», — диэн Баграт Данелян  санаатын үллэһиннэ.
Санатар буоллахха, быйыл ыам ыйын 14 күнүттэн икки зондировщик-сөмөлүөт уопсайа 27 тустаах көтүүнү оҥорбут, бу барыта 130 чааска тэҥнэһэр.
Ыытыллыбыт үлэ түмүгүн РФ  Бэрэсидьиэнигэр уонна СӨ Ил Дарханыгар билиһиннэриэхтэрэ. Билигин  да ойуур баһаардара баалларынан сибээстээн, «Авиалесоохрана» Ан-26 Циклон диэн сөмөлүөтэ  салгыы үлэлии хаалар.
Санатар буоллахха, быйыл бэс ыйын саҥатыгар РФ Бэрэсидьиэнэ Владимир Путин СӨ Ил Дархана Айсен Николаев Саха сиригэр ойуур баһаардара турууларын намтатыыга аналлаах искусственнай ардаҕы ыҥырыы эспэримиэнин ыытарга диэн этиини киллэрбитин толору өйөөбүтэ уонна онно эппиэттээхтэринэн  РФ  премьер-миниистирэ  Михаил Мишустин  уонна СӨ Ил Дархана Айсен Николаев анаммыттара.

 

Хаартыска — Мария Васильева (СИА)
1
0
Telegram @edersaas20