Саха сиригэр Инновационнай научнай-технологическай киин тэриллэрэ былааннанар
Уһук Илин уонна Арктика сайдыытын миниистирэ Алексей Чекунков Саха сиригэр Инновационнай научнай-технологическай киин тэриллиэн сөбүн бэлиэтээтэ.
«Саха сирэ —— Уһук Илин IT эйгэтигэр бастыҥнар ахсааннарыгар сылдьар. Хотугулуу-Илиҥҥи федеральнай университет, ДВФУ, Тихоокеанскай государственнай университет курдук инники күөҥҥэ сылдьар кииннэри кытта Саха сирин креативнай уонна үрдүк технологиялаах биисинэһин бииргэ үлэлээһиннэрин тэрийдэххэ, Азиатскай-Тихоокеанскай эригийиэннэргэ IT-салаатын сайдар кыаҕа биллэ күүһүрүөҕэ. Биһиги билиҥҥи кэмҥэ Нуучча арыытыгар үлэлиир Инновационнай-технологическай киин курдук үрдүк технологиялаах бырайыактары өйүүр механизмнары сайыннарабыт. Саха сиригэр бэйэтигэр маннык ИНТЦ тэриллэригэр бары усулуобуйа баар. Оччотугар икки киин бэйэ-бэйэлэрин кытта ыкса сибээстээхтик үлэлиэхтэрин сөп, — диэн бэлиэтээтэ Алексей Чекунков.
Уһук Илин уонна Арктика сайдыытын миниистирэ холобурдаабытынан, билигин Арассыыйаҕа үрдүк технологиялаах биисинэһи сайыннарарга уонна дойду наукатын аныгы технология хайысхатынан арыйыылары олоххо киллэриигэ үлэлэһэр түөрт Инновационнай-технологическай киин баар. Бу «Сириус» (Сочи к.), «Воробьевы горы», «Долина Менделеева» (Москва к.) уонна «Русский» (Владивосток к.) Инновационнай-технологическай кииннэр. Кинилэр үлэлэрэ 2017 с. от ыйын 29 күнүнээҕи 216 №- дээх «Инновационнай научнай-технологическай кииннэр тустарынан уонна Российскай Федерация туспа сокуоннарыгар уларытыылары киллэрии туһунан» федеральнай сокуоҥҥа олоҕурар.
Елена ПОТОЦКАЯ, “Саха сирэ” хаһыат, edersaas.ru