Үөрүүлээх тэрээһиҥҥэ телемост эрэсииминэн РФ энергетикаҕа миниистирэ Николай Шульгинов, Ил Дархан Айсен Николаев уонна «Россети» ПАУо генеральнай дириэктэрэ Андрей Рюмин кытыннылар.
Николай Шульгинов бэлиэтээбитинэн, саҥа тутуллубут станциялар бырамыысыланнас саҥа эбийиэктэрин эрэллээхтик уотунан-күөһүнэн хааччыйыахтара уонна өрөспүүбүлүкэ, Уһук Илин экономикатын уонна энергияны туһаныы сайдыытыгар төһүү күүһүнэн буолуохтара.
«Улахан далааһыннаах үлэ ыытылынна. Саха сирэ түргэн тэтиминэн сайдан иһэр бырамыысыланнай эрэгийэн буолар. Бырамыысыланнас сайдыыта энергетическэй хааччыллыыттан быһаччы тутулуктаах. Билигин “Россети” хампаанньа биһиги бырамыысыланнаспыт “энергетическэй каркаһын” тутар. Инникитин атын даҕаны бырамыысыланнай бырайыактарбыт өйөбүлү ылыахтара диэн эрэллээхпин», – диэн эттэ Айсен Николаев.
Саҥа энергоэбийиэктэр үлэҕэ киириилэрэ Саха сирин оройуоннарын гаастааһыҥҥа уонна гааһынан хааччыйыыга туһааннаах усулуобуйаны олохтуурун таһынан, Кытайга гааһы экспорка таһаарыыга итиэннэ «Южная Якутия» урутаан сайдар сири уотунан хааччыйыыга олук ууруоҕа.
«Өрөспүүбүлүкэ киин уонна арҕаа оройуоннарыгар улахан үлэ ыытылынна. Ол иһигэр Нерюнгри ГРЭС-тэн 750 км транзит олохтонно. «КС-1» уонна «Налдинскай» станциялар «Сибиир күүһэ» ситим уонна Инаглинскайдааҕы хайаны байытар комплекс сайдыыларыгар улахан күүһүнэн буолуоҕа», – диэн Андрей Рюмин бэлиэтээтэ.
«КС-1» — 50 МВА, «Налдинскай» — 176 МВА кыамталаахтар. Тутуу «ФСК ЕЭС» ПАУо инвестиционнай бырагырааматын быһыытынан үлэҕэ киирдэ.