Сүрүн Экэниэмикэ

Саха сиригэр хомунаалынай өҥөлөрү судургутук төлүөхпүт

Хомунаалынай өҥөнү төлөөһүн судургу буолуоҕа. Хайдах? 

Саха сиригэр дьиэ-уот хомунаалынай өҥөлөрүн төлөөһүнү судургу гынар холбоһуктаах төлүүр докумуон сервиһин олоххо киллэриэхтэрэ. 2022 сылтан Дьокуускайга, онтон 2023 сылтан оройуоннарга киириэҕэ. Бу бырайыак хаамыытын Саха сирин Бырабыыталыстыбатын Бэрэссэдээтэлэ Андрей Тарасенко ыыппыт мунньаҕар дьүүллэстилэр.

Премьер бэлиэтииринэн, өрөспүүбүлүкэ олохтоохторо дьиэ-уот хомунаалынай өҥөлөрүн биирдэ баттаан онлайн төлүөхтэрэ.

ОДьКХ өҥөлөрүн бүттүүнэ “биир түннүк” электроннай көрүҥҥэ көһүөҕэ. Бу сервис олохтоохторго төһө төлөбүр олохтоммутун  көрөргө уонна төлүүргэ табыгастаах буолуоҕа.

Манна ресурсанан хааччыйар сүрүн тэрилтэлэр иһитиннэриилэрэ барыта түмүллүөҕэ. Хайы-үйэ Саха Өрөспүүбүлүкэтигэр элбэх кыбартыыралаах дьиэлэри хапытаалынайдык өрөмүөннээһин пуондатын, “Якутскэкосети” ХЭТ, “СӨ ОДьКХ” ГУП, “Водоканал” АУо уонна “Сахатранснефтегаз” АУо тэрилтэлэри кытта сөбүлэһиилэр түһэрсилиннилэр.

Тэрилтэлэр биэрэр чахчыларын Саха сирин судаарыстыбаннай уонна муниципальнай өҥөлөрүн порталыгар — e-yakutia.ru киллэрэргэ тэхиньиичэскэй кыаҕы биэрдилэр.

Өрөспүүбүлүкэ Ил Дарханын Айсен Николаев сорудаҕынан 2024 сылга диэри  сыыппара трансформациятын чэрчитинэн төлөбүрү биирдэ түмэн төлүүр пилотнай бырайыак өрөспүүбүлүкэ үрдүнэн үлэлиэхтээх.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата

Бэлэмнээтэ Женни Стрюкова

Хаартыска: тустаах саайтан

0
1