Чугастааҕы кэмҥэ поликлиникаларга былааннаах көрдөрүүлэрин кэмигэр хат дьахталларга булгуччулаах тестээһини ыытыахтара. Билиҥҥи туругунан ураты болҕомто ОРВИ сибикилээх дьоҥҥо амбулаторнай уталытыллыбат көмөнү оҥорууну, ону тэҥэ больничнай илиистэри суһаллык толорууга ууруллуоҕа. Бу туһунан суһал штаб брифинигэр вице-премьер Ольга Балабкина иһитиннэрдэ.
Өрөспүүбүлүкэҕэ эпидемия балаһыанньата ыгым. Коронавирус саҥа дьаҥынан ыалдьыы тэтимэ нэдиэлэ устата биир таһымҥа турар.
Кэнники сууккаҕа стационарга эмтэнэ өрөспүүбүлүкэҕэ 127 киһи киирдэ, бу иннинэ – 135 киһи. Суукка устата 1710 саҥа ыалдьыы бэлиэтэннэ. Балыыһаҕа киирбиттэртэн 30 бырыһыана – оҕолор, кинилэр олус кутталлаах бөлөххө киирсэллэр. Бу бөлөххө ону тэҥэ хат дьахталлар хапсаллар.
Саха сирин Ил Дархана Айсен Николаев сорудаҕынан педиатрдар биригээдэлэрэ ыҥырыынан тиийдэҕинэ дьиэ кэргэн бары чилиэниттэн анаалыһы ылыахтаах. Дьиэҕэ ыҥырыынан тиийэр педиатрдар ахсааннара элбэтилиннэ.
Ольга Балабкина Саха сирин бары олохтоохторун, ордук хат дьахталлар уонна оҕолор чугас дьоннорун дьиэҕэ олороллоругар, элбэх дьон тоҕуоруйар сиригэр мустубаттарыгар ыҥырда.
Ураты хонтуруолга – Дьокуускай куоракка, Хаҥалас, Мэҥэ Хаҥалас, Нам, Горнай, Чурапчы улуустарыгар үөскээбит эпидбалаһыанньа.
Вице-премьер кэккэ оройуоннарга ыарыы үрдүк көрдөрүүтэ быһыыны ылыы уонна хаттаан ылыы тэтимэ намыһаҕын кытта сибээстээҕин бэлиэтээтэ.
“Быһыыны ылан уонна хаттаан ылан баран, чэпчэкитик ыалдьыахха сөп. Ону хас биирдиибит үчүгэйдик өйдүөхтээх”, — диэтэ Ольга Валерьевна.
Өрөспүүбүлүкэ үрдүнэн бастакы компонены 565 тыһ. Саха сирин олохтооҕо (78,9 быр. улахан нэһилиэнньэ) ылла. 119 тыһыынча киһи хаттаан ыллылар. Бу хаттаан ылар болдьохторо кэлбит дьон 58 бырыһыана.
Дьокуускайга уонна оройуоннарга ОРВИ сибикилээх дьоҥҥо суһал амбулаторнай көмөнү оҥорорго эбии былаһааккалар арылыннылар. Онно тиийэн ыарыыны бигэргэттэрэн, больничнай илииһи арыйтаран, эми-тому ылыахха сөп.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Хаартыска: тустаах саайтан
Бэлэмнээтэ Женни Стрюкова