Саха сиригэр халаантан көмүскүүр даамбаны тутуу сүрүн сорукка баарын туһунан Уу ресурсаларын федеральнай ааҕыныстыбатын салайааччы Дмитрий Кириллов иһитиннэрдэ.
Санатан суруйдахха, атырдьах ыйын 15 күнүгэр РФ премьер-миниистирэ Михаил Мишустин салалтатынан ыксаллаах быһыы-майгы содулун чөлүгэр түһэрии туһунан мунньах буолбута. Манна Ил Дархан Айсен Николаев Намҥа уонна Дьааҥыга халаантан көмүскүүр даамбалар тутуллаллара наадатын эппитэ. Бу икки эбийиэк бырайыактара судаарыстыбаннай эспэртиисэни ааспыттара. Федеральнай үбүлээһин көрүлүннэҕинэ уонна судаарыстыбаннай бырагыраамаҕа хабылыннахтарына, олоххо киириэхтэрин сөп.
«Күн бэбиэскэтигэр халаантан көмүскүүр хапытаалынай тутуулары салҕааһын баар. Бу өрөспүүбүлүкэҕэ биир улахан суолатлаах боппуруоһунан буолар. Үөһээ Бүлүүгэ маннык бырайыагы олоххо киллэрээри сылдьабыт. Дьааҥыга маннык тутуу барыахтаах. Бүддьүөт тыырыллыытыгар бу бастакы уочаракка туруоҕа. Маныаха тустаах үлэ 2023 сылтан саҕаланыаҕа», — диэн Дмитрий Кириллов иһитиннэрдэ.