Атырдьах ыйын 24 күнүгэр “Өлүөнэ очуостара” айылҕа пааркатыгар Го оонньууга Саха сирин Ил Дарханын кубога уонна Уһук Илиҥҥи федеральнай уокурук күрэхтэһиитэ үөрүүлээх быһыыга-майгыга аһылынна. Күрэхтэһиилэр кыттыылаахтарын, тэрийээччилэри уонна ыалдьыттары өрөспүүбүлүкэ баһылыга Айсен Николаев эҕэрдэлээтэ.
edersaas.ru
«Биһиги өрөспүүбүлүкэбитигэр бу былыргы оонньууну сөбүлээччилэр ахсааннара сылтан сыл аайы эбиллэн иһэр, ону быйылгы чемпионат туоһулуур. Маннык тэрээһиннэри ыытыы элбэх дьон – үөрэнээччилэр уонна улахан дьон бу оонньууга кыттыһалларыгар көмөлөһүөҕэр эрэнэбин. Мин бу стратегическай оонньууну сөбүлээччи буоларбынан, Владивостоктан Калининградка тиийэ уонунан эрэгийиэнтэн күүстээх оонньооччулары түмпүт турнир биһиэхэ өрөспүүбүкүлэҕэ ыытылларын биһириибин”, — диэтэ Айсен Николаев.
Ил Дархан бэлиэтээбитинэн, маннык улахан күрэхтэһиилэри тэрийии – баҕар сотору кэминэн Арассыыйаҕа Го оонньуулар кииннэринэн Саха сирин билинии.
Айсен Николаев өрөспүүбүлүкэҕэ эбии үөрэхтээһин систиэмэтигэр, төһө кыалларынан, элбэх өй үлэтин оонньуутун – саахыматы, дуобаты, Го уо.д.а. актыыбынайдык киллэриэххэ уонна сайыннарыахха наадатын бэлиэтээтэ.
Тэрээһин кыттыылаахтарын күрэхтэһии генеральнай бииргэ үлэлэһээччилэрэ эҕэрдэлээтилэр. “Полиметалл” аахсыйалаах уопсастыба генеральнай дириэктэрэ Виталий Несис эппитинэн, кини Го оонньуунан 30-тан тахса сыл дьарыктанар, элбэх күрэхтэһиилэргэ кыттыбыт, Го – успуорт эрэ буолбатах, тулалыыр эйгэҕэ, аан дойдуга сыһыан, философия уонна инникигэ кирбии.
«Русатом Оверсиз» хампаанньа бэрэстэбиитэлэ Святослав Пих бэлиэтээн эппитинэн, Го оонньуу – инникини хайдах көрөр, уһун кэмнээх кэскили оҥостор туһунан өйдөбүлү биэрэр стратегия.
“Го Арассыыйатааҕы федерацията» бүтүн Арассыыйатааҕы уопсастыбаннай тэрилтэ бастакы вице-бэрэсидьиэнэ, күрэхтэһиилэр кылаабынай судьуйалара Владимир Горжалцан, Саха сиригэр Го оонньуулар федерацияларын бэрэсидьиэнэ Александр Егоров Саха сирин салалтатыгар, генеральнай спонсордарга – “Полиметалл” уонна “Росатом” судаарыстыбаннай корпорацияҕа күүстээх састааптаах турниры Саха сиригэр ыытар кыаҕы биэрбиттэригэр махтанна.
Саха сирин Ил Дарханын кубогар (Арассыыйа кубогын түһүмэҕэ) 54 спортсмен, Уһук Илиҥҥи федеральнай уокурук күрэхтэһиитигэр 48 спортсмен кытталлар. Кыттааччылар ортолоругар Арассыыйа 4 гроссмейстера, Арассыыйа 3 үтүөлээх маастара, 12 маастара бааллар.
Турнир түмүктүүр оонньуулара атырдьах ыйын 26 күнүгэр өрөспүүбүлүкэтээҕи саахымат-дуобат киинигэр буолуохтара. Атырдьах ыйын 27-28 күннэригэр Дьокуускайга Комсомольскай болуоссакка Genius Extreme ГО бэстибээл ыытыллыаҕа. Атырдьах ыйын 27 күнүгэр бэстибээл кэмигэр Саха сирин Ил Дарханын Кубогын уонна Уһук Илинҥи федеральнай уокурук күрэхтэһиитин кыайыылаахтарын наҕараадалыахтара.
Надежда ЕГОРОВА, «Саха сирэ», edersaas.ru (СӨ Ил Дарханын уонна бырабыыталыстыбатын пресс-сулууспатын матырыйаалынан)