Сотору, атырдьах ыйын 27-28 күннэригэр, Дьокуускай куоракка Го оонньуу бэстибээлэ буолуоҕа.
Саха сиригэр ыытыллыахтаах Го оонньууга сыһыаннаах сонуннары гоякутия.рф саайтка киирэн билсиэххэ сөп. Ол курдук, от ыйыгар Го оонньууга үөрэтэр сайыҥҥы лааҕыр аһыллыбыт, анал турнирдар уонна куораттааҕы квестар ыытыллыбыттар. Сүрүн тэрээһиннэр – Го бэстибээлэ уонна Ил Дархан бирииһигэр бастакы Кубога — атырдьах ыйын 22-28 күннэригэр буолуохтара. Арассыыйа араас эрэгийиэннэриттэн оонньуу маастардара кэлэн, атырдьах ыйын 23 күнүттэн “Демьян Бедный” теплоходунан Өлүөнэнэн устан иһэн күрэхтэһиэхтэрэ. Тэрээһин сүрүн спонсорынан “Полиметалл” хампаанньа буолар
Бэстибээл кыттыылаахтара сонун оонньуу быраабылатын, албастарын үөрэтиэхтэрэ, хайдах быһыылаахтык сайдыбытын, тарҕаммытын туһунан билиэхтэрэ. Го аан дойдуга биир сааамай тарҕаммыт оонньуунан буолар. 2000 сыллааҕы дааннайынан, аан дойду үрдүнэн 27 мөл киһи бу оонньуунан үлүһүйэр. Ол эрээри, бу оонньуу Кытайга, Японияҕа уонна Соҕуруу Кореяҕа ордук тэнийбит буолан (80 % кэриҥэ), арҕаа дойдуларга билигин даҕаны дьикти, эриэккэс оонньуунан ааҕыллар. Арассыыйаҕа 80 тыһыынча кэриҥэ киһи манан үлүһүйэрэ биллэр. Саха сиригэр быйылгыттан Го оонньуунан күүскэ дьарыктанан бардахпытына, дойду бастыҥ оонньооччуларын иитэн таһаарар кыахтаахпыт.
Хаартыска — интэриниэт ситимиттэн