Сүрүн

Саха сиригэр эрэгийиэннэр икки ардыларынааҕы ыксаллаах быһыы-майгы эрэсиимэ биллэрилиннэ

Бүгүн аармыйа генерала Евгений Зиничев ойуур баһаардарын бохсууга мунньах ыытта. Манна Саха сиригэр буола турар быһыыны-майгыны бастакы уочарат көрдүлэр-иһиттилэр. Мунньах түмүгэр салайааччы эрэгийиэннэр икки ардыларынааҕы — Саха сирин уонна Иркутскай уобалас сиригэр-уотугар ыксаллаах быһыы-майгы эрэсиимин биллэрдэ. Бу туһунан Ил Дархан Айсен Николаев бүгүҥҥү брифинигэр иһитиннэрдэ.

— Бу быһаарыныы ойуур баһаардарын бохсууга федеральнай резервэ күүстэрин арыый көҥүллүк туһанарга уонна федеральнай үбүлээһин түргэнник көрүллэригэр кыаҕы биэрэр. Бүтэһик күннэргэ Саха сиригэр дойду бэрэсидьиэнин дьаһалынан манна РФ ЫБММ бөлөхтөрө, салгын суудуналара кэллилэр. Хабаровскайтан Ми-26 уонна Амурскай уобаластан Ми-8 бөртөлүөттэр кэллилэр.

Ойуур баһаардарын балаһыанньата бэҕэһээҥҥиттэн улаханнык уларыйбата. 14 нэһилиэнньэлээх пууҥҥа үлэ күүһүрдүлүннэ. Бүгүн Мииринэйтэн ЫБММ күүстэрин илдьэ сөмөлүөт иһэр. Кинилэр Намҥа, Горнайга, Уус Алдаҥҥа барыахтара. Хабаровскайтан, Приморскайтан кэлбит эбии күүстэр кэлэн, суһал бөлөх тэриллиэҕэ. Эбии 75 киһи кэлиэхтээх.

Өрөспүүбүлүкэҕэ ойуур баһаардарын умуруорууга үлэни Арассыыйа Ыксаллаах быһыыга-майгыга министиэристибэтэ салайыаҕа. Евгений Зиничев солбуйааччыта аҕыйах күҥҥэ манна хаалан салгыы үлэлиэҕэ.

0
0