Былырыын Саха сирин балыыһаларыгар уонна поликлиникаларыгар, 2017 сылы кытта тэҥнээтэххэ, 310 бырааһынан уонна 548 мэдиссиинискэй сиэстэрэнэн элбэх исписэлиис үлэлээбитэ.
Бу, биллэн турар, доруобуйа харыстабылын салаатыгар каадыр кыһалҕатын балай эмэ быһаарбыта. Кыһалҕаны быһаарарга “”Доруобуйа харыстабыла” Национальнай бырайыак “СӨ доруобуйа харыстабылын мэдиссиинискэй тэрилтэлэрин үрдүк таһымнаах каадырдарынан хааччыйыы” эрэгийиэннээҕи бырайыага туһалаата. Бырайыак сүрүн сыала-соруга – бастакы сүһүөх мэдиссиинискэй тэрилтэлэргэ каадыр тиийбэт боппуруоһун быһаарыы уонна профильнай исписэлиистэри бэлэмнээһин. Ол түмүгүнэн, өрөспүүбүлүкэ эмчиттэрин ахсаанын элбэтии ситиһилиннэ:
Быраастарынан хааччыллыы — 10 тыһыынча нэһилиэнньэҕэ 50,0 — 52,8; орто сүһүөх мэдиссиинискэй үлэһиттэринэн – 10 тыһыынча нэһилиэнньэҕэ 115,4 — 116,8 улаатта.
2021 сылга Саха сиригэр 5136 быраас, 11350 орто сүһүөх мэдиссиинискэй үлэһит, 3688 алын сүһүөх мэдиссиинискэй үлэһит үлэлээтэ.
Каадырдары тардарга араас дьаһал ыытылынна. Холобур, “Тыа сирин доктора/биэлсэрэ” бырагыраама көмөтүнэн улуустарга миэдиктэри үлэлэтии, мэдиссиинискэй уонна фармацевтическай үөрэххэ аһаҕас порталы үлэлэтии (үлэлии сылдьар быраастар уонна мэдиссиинискэй сиэстэрэлэр эмиэ үөрэнэллэр). Маныаха үрдүк үөрэх кыһаларыгар уонна кэллиэстэргэ үөрэнэ сылдьааччыларга ураты болҕомто ууруллар.
Бүддьүөт суотугар үөрэнэр устудьуоннары кытары тус сыаллаах дуогабары түһэрсии эмиэ сылтан сыл аайы элбии турар. 2021/2022 үөрэх дьылыгар 304 дуогабар түһэрсилиннэ.
Быйыл ординатураҕа — 84¸орто идэлээх үөрэтии бырагырааматынан 234 киһи үөрэнэ барда.
Маннык тиһиктээх үлэ үчүгэй түмүктээх буолла.
Надежда ЕГОРОВА, «Саха сирэ», edersaas.ru