Саха сиригэр электроннай сэрэбиэйдэһии көмөтүнэн бултуурга көҥүлү биэрэр туһунан сокуону ылыннылар

СӨ Судаарыстыбаннай Мунньаҕа (Ил Түмэн) олунньу 26 күнүгэр “Бултааһын уонна булт ресурсаларын харыстааһын туһунан” Саха Өрөспүүбүлүкэтин Сокуонун 11 ыстатыйатыгар уларытыылары киллэрэр туһунан сокуон бырайыагын ылынна. 2020 сылтан туундараҕа популяциялыыр хотугу табаттан уонна киистэн ураты, бултуурга илимиит олохтонор булт ресурсаларын бултааһыҥҥа көҥүлү тыырыы ньымата уларыйыаҕа.

“Бары булчуттар өр күүппүт бултааһын туһунан сокуоҥҥа көннөрүүлэр киирдилэр, — диэтэ бу туһунан өрөспүүбүлүкэ сыыппара сайдыытыгар уонна инфокоммуникационнай технологияларга инновациятын миниистирэ Анатолий Семенов. – Онон, бултуурга көҥүлү тыырыыга кыттарга e-yakutia.ru портал нөҥүө бэриллибит сайаапкалар ахсааннара бэриллэр кубуота кээмэйин куоһардаҕына, электроннай көрүҥүнэн сэрэбиэйдэһии ыытыллыаҕа”.

Санаттахха, бултуурга көҥүлү биэриигэ электроннай суруйтарыы 2018 сыллаахха тэриллибитэ. Былырыын манна үс тыһыынча кэриҥэ киһи кыттыбыта.

СИА.