Саха сиригэр социальнай суолталаах ас-үөл саппааһын көрөллөр, ол иһигэр бурдугу.
Оройуоннарга 180 күҥҥэ тиийэр бурдук саппааһа баар. Бу туһунан СӨ Бырабыыталыстыбатын Бэрэссэдээтэлэ Андрей Тарасенко улуус баһылыктарын кытары мунньах түмүгүнэн иһитиннэрдэ. Манна даҕатан эттэххэ, СӨ Ил Дархана Айсен Николаев өрөспүүбүлүкэ тэрилтэлэригэр аһы-үөлү эрдэ тиэйэн аҕалыыга, ас-үөл боппуруоһугар болҕомтону уурарга соруйбута.
«Бигэ балаһыанньалаах оройуоннар бааллар. Ол гынан баран, итиннэ мөлтөхтүк көрүнээччилэр суох буолбатахтар. Улуустар баһылыктара миэстэтигэр ас-үөл төһөтүн, туохха наадыйыы баарын билэ олоруохтаахтар. Урбаанньыттары кытары хайаан да сибээһи тутуҥ. Таһаҕас тиэйиитигэр ханна туох кыһалҕа баарын уталыппакка быһаарар туһуттан, иһитиннэриини тута барытын тиэрдэн иһиҥ«, — диэтэ Андрей Тарасенко.
Өрөспүүбүлүкэ атыыга-эргиэҥҥэ сэттэ улахан тэрилтэтин иһитиннэриитинэн, билиҥҥи туругунан 2800 туоннаттан тахса бурдук саппааһа баар. Андрей Тарасенко манна даҕатан өрөспүүбүлүкэҕэ урбаанньыттары өйүүргэ миэрэлэр ылыллыбыттарын, иһитиннэриини хас биирдии тэрилтэҕэ тиэрдэллэригэр улуус баһылыктарын сорудахтаата.
Бурдугу ыларга өрөспүүбүлүкэ бүддьүөтүгэр 114, 3 мөл.солк. кээмэйдээх субсидия, онтон Якутопторга Арктика уонна уустук суоллаах-иистээх улуустары ас-үөл саппааһын хааччыйарга 208,1 мөл.солк. кээмэйдээх субсидия көрүллүбүт.
+1
+1
+1
+1
+1
+1
+1