Ахсынньы 29 күнүгэр Дьокуускай куоракка дьэллик ыттар дьахтар тыыныгар турбут алдьархайдаах быһылаанын кэнниттэн Саха сирин былаастара ыты тутар биригээдэ ахсаанын элбэтиэхтэрэ. Бу туһунан суруналыыстарга Бырабыыталыстыба бэрэссэдээтэлин бастакы солбуйааччы Дмитрий Садовников иһитиннэрдэ.
“Бастатан туран, дьэллик ыттары тутар биригээдэлэр ахсааннарын хас да төгүл элбэтиэххэ наада, туох баар тиэхиньиичэскэй күүһү-көмөнү барытын бу кыһалҕаҕа уурарга уонна кыылы тутар пуун үлэтин төрдүттэн быһаарыахха наада. Туох баар туһааннаах көмөнү бырабыыталыстыба оҥоруоҕа”, — диэн Садовников бэлиэтээн эттэ. Кини сырдык тыына быстыбыт дьахтар дьиэ кэргэнигэр кутурҕанын тиэртэ. “Хомойуох иһин, дьэллик ыттар киһиэхэ саба түһүүлэрэ биһиги куораппытыгар бастакы эрэ түбэлтэ буолбатах. Маннык быһылаан киин куорат былаастара бэйэтин кэмигэр туһааннаах дьаһалы ылымматахтарыттан таҕыста дии саныыбын. Өссө туспа эппиэтинэс СӨ Ветеринарияҕа департаменыгар эмиэ сүктэриллэр, дьэллик кыыллары тутуу үлэтин көрүөхтээх-истиэхтээх этилэр”, — диэтэ Дмитрий Дмитриевич.
Ахсынньы 29 күнүгэр Дьокуускай ипподромугар бэйдиэ сылдьар ыттар 53 саастаах дьахтарга саба түһэннэр, тыыныгар турдулар. Бу быһылаанынан холуобунай дьыала тэрилиннэ.